Qeveria e Kosovës e ka miratuar projektbuxhetin për vitin 2025. Buxheti projektohet të jetë 3.6 miliardë euro, ka njoftuar kryeministri Albin Kurti, para se kabineti qeveritar ta miratonte projektbuxhetin, i cili tash do të shkojë në Kuvend të Kosovës për votim.
“Performanca dhe rritja e buxhetit përgjatë këtyre katër viteve ka qenë si asnjëherë më parë. Vit pas viti, kemi pasur rritje dyshifrore të të hyrave buxhetore, pa ndryshuar asnjë politikë fiskale, gjë që ka mundësuar edhe rritjen e buxhetit pa e rritur borxhin publik e pa shkaktuar barrë financiare për gjeneratat e ardhshme.
Për vitin 2025, buxheti i projektuar shënon nivelin 3.608 miliardë euro, që është për rreth 300 milionë euro apo shprehur në përqindje për 8.87% më i lartë sesa ai i vitit 2024”, tha Kurti gjatë adresimit të tij para kabinetit qeveritar.
Sipas tij, nga ky buxhet, 916.5 milionë euro do të shkojnë për pagat e sektorit publik, duke përfshirë edhe rritjen e pagave që u prezantua në konferencën e djeshme, ku nga janari pagat rriten për 55 euro për të gjithë punonjësit në sektorin publik, kurse prej korrikut rritja e pagave bëhet 110 euro për secilin.
“Kjo e sjell pagën mesatare në sektorin publik për vitin 2025 në 870 euro në muaj bruto. Krahasuar me vitin para-pandemik 2019, kur buxheti për paga kishte qenë 616.9 milionë euro, në vitin 2025 kemi një rritje prej 300 milionë eurove vetëm për paga, apo përkthyer në përqindje, kemi të bëjmë me një rritje prej 48.5%”, shtoi shefi i ekzekutivit.
Tutje Kurti tha se Bruto Produkti Vendor nga viti 2019 deri në vitin 2024 është i projektuar të rritet për 46.2%.
“Pagat 48.5 %. Bruto Produkti Vendor 46.2 %. Ashtu siç e kemi thënë pra, rritja e pagave në qeverinë tonë lidhet me rritjen ekonomike – aq sa rritet ekonomia e produktiviteti, do të rriten edhe pagat. Kjo edhe u jep siguri e parashikueshmëri shërbyesve publikë, sepse me neve e dinë saktë se rritje të pagave do të ketë çdo vit dhe aq sa rritet ekonomia, ashtu siç tashmë e kemi dëshmuar, por njëkohësisht kjo metodë nënkupton edhe qëndrueshmëri fiskale në afatgjatë sepse sektori publik kësisoj nuk bëhet barrë që e kolapson pjesën tjetër të ekonomisë. Pra edhe parashikueshmëri e planifikim, edhe qëndrueshmëri në terma afatgjatë”, nënvizoi Kurti.
Ai vijoi duke prezantuar planifikimet buxhetore. “Tek kategoria Mallra dhe Shërbime kemi planifikuar që 105 milionë euro të ndajmë për nevojat e shëndetësisë, në Ministrinë e Shëndetësisë dhe në ShSKUK, ashtu që të sigurohen barnat esenciale dhe materiali shpenzues përkatës. Ndërkaq 87 milionë euro tjera i kemi planifikuar për nevojat e sigurisë dhe mbrojtjes, që do të shkojnë në municion, pajisje e furnizime të nevojshme ashtu që policia dhe ushtria jonë t’i kryejnë detyrat me efikasitet të plotë. Për pensionistët tanë kemi buxhetuar edhe 100 milionë euro tjera shtesë, për të mbuluar rritjen e pensioneve prej 20% që tashmë e kemi miratuar. Ndërsa 60 milionë euro tjera janë shtuar tek skema e shtesave për fëmijë, për të mbuluar rritjen e shtesave që e bëmë para 2 muajsh për 3-vjetorin e lansimit të skemës”, theksoi Kurti./rtk
