Për vite me radhë, qiqrat kanë qenë të lëna pas dore në raftet e kuzhinës. Përdoren kryesisht për të shtuar volum në një gjellë ose për t’u përfshirë në dieta vetëm sepse dimë që na nevojitet më shumë fibër.
Kohët kanë ndryshuar dhe, për habinë tonë, bishtajat janë bërë shumë të njohura në Britani – me qiqrat në krye të vëmendjes. Tani i gjejmë të pjekura dhe të spërkatura me kripë deti dhe spec të kuq për një shije të veçantë, të përziera në humus të butë, në kerri pikant apo madje edhe në ëmbëlsira dhe pjekuri. Pak ushqime kanë pësuar një transformim kaq të madh, duke rritur ndjeshëm popullaritetin e tyre.
Sipas ekspertëve të industrisë, kjo rritje ka tre arsye kryesore:
Shtimi i dietave me bazë bimore.
Ndërgjegjësimi gjithnjë në rritje se ushqimet ultra të përpunuara nuk janë të mira për shëndetin tonë, duke na shtyrë drejt alternativave më të thjeshta dhe më të shëndetshme.
Obsesioni ynë me shëndetin e zorrëve – qiqrat janë plot me fibër, e cila ushqen mikrobet e dobishme të organizmit.
Ndryshimi i imazhit të tyre ka ndikuar gjithashtu, me njerëzit që investojnë më shumë në kavanoza me cilësi të lartë. Edhe pse ende mund të gjeni qiqra të lira në supermarket, marka të njohura si Bold Bean Co ofrojnë lloje më të kremta dhe me lëkurë më të hollë, por me çmime mbi 3 paund për kavanoz.
Pavarësisht markës, qiqrat janë të dobishme për shëndetin. “Janë ushqim i pasur me vlera, i gjithanshëm dhe i lirë – një kombinim perfekt,” thotë nutricionistja Sophie Trotman.
Tetë përfitimet shëndetësore të qiqrave
- Të mira për kocka dhe muskuj të fortë
“Qiqrat janë një burim i shkëlqyer i proteinave, të cilat janë thelbësore për rritjen e kockave në fëmijëri dhe ruajtjen e masës kockore dhe muskulore me kalimin e moshës,” shpjegon Trotman.
Në 100 g qiqra gjenden 7.2 g proteina. Gratë kanë nevojë për rreth 45 g proteinë në ditë, ndërsa burrat për 55 g.
Megjithatë, proteinat bimore si qiqrat nuk përmbajnë të nëntë aminoacidet esenciale. Për të marrë një profil të plotë aminoacidesh, ato duhet të kombinohen me drithëra, fara ose arrorë.
Qiqrat përmbajnë gjithashtu kalcium (49 mg/100 g) dhe magnez (48 mg/100 g), të cilat mbështesin funksionin e muskujve dhe sistemin nervor.
- Ndihmojnë në humbjen e peshës
Proteinën dhe fibrat i ndihmojnë njerëzit të ndihen më të ngopur për një kohë më të gjatë, duke shmangur ngrënien e tepërt. Fibrat ndihmojnë gjithashtu në stabilizimin e nivelit të sheqerit në gjak, duke parandaluar rënie të papritura të energjisë dhe dëshirën për ushqime të ëmbla.
- Përmirësojnë shëndetin e zorrëve
Qiqrat janë të pasura me fibra, të cilat ushqejnë bakteret e dobishme në zorrë dhe mbështesin një tretje të shëndetshme. Ato ndihmojnë gjithashtu në parandalimin e kapsllëkut, një faktor kyç për mirëqenien e përgjithshme.
- Ulin kolesterolin
Fibra e tretshme në qiqra lidhet me kolesterolin në zorrë dhe ndihmon në largimin e tij nga trupi, duke ulur nivelet e kolesterolit LDL (“të keq”) dhe duke zvogëluar rrezikun e sëmundjeve të zemrës.
- Mbështesin shëndetin e lëkurës
Qiqrat përmbajnë zink, i cili është i dobishëm për rigjenerimin e lëkurës dhe sistemin imunitar. Ato janë gjithashtu një burim natyral i biotinës (vitamina B7), e cila ndihmon në shëndetin e flokëve dhe thonjve.
- Rrisin nivelet e energjisë
Qiqrat përmbajnë hekur (2.9 mg/100 g), i cili është thelbësor për transportin e oksigjenit në trup dhe për ruajtjen e niveleve të energjisë. Trupi e përthith më mirë këtë lloj hekuri kur kombinohet me burime të vitaminës C, si specat e kuq ose brokoli.
- Mund të zvogëlojnë rrezikun e kancerit
Fibra e tyre ndihmon në parandalimin e formimit të përbërjeve të dëmshme që mund të dëmtojnë qelizat dhe të çojnë në zhvillimin e kancerit. Gjithashtu, qiqrat përmbajnë antioksidantë si polifenole dhe saponina, të cilët mbrojnë qelizat nga stresi oksidativ dhe inflamacioni.
- Mbështesin shëndetin e trurit dhe kujtesën
Qiqrat janë një burim i mirë i zinkut, i cili është i rëndësishëm për funksionin e sistemit nervor dhe për proceset kognitive, duke ndihmuar në përmirësimin e të nxënit dhe kujtesës.
Si mund të konsumohen qiqrat?
Nuk ka një mënyrë të vetme më të mirë për të ngrënë qiqrat – më e rëndësishmja është t’i përfshini rregullisht në dietën tuaj.
Ato mund të konsumohen direkt nga konserva, të përzihen me tahini, lëng limoni, vaj ulliri dhe hudhër për të bërë humus ose të shtohen në gatime të ndryshme si supa, sallata, kerri dhe madje edhe ëmbëlsira.s.n.
