Kryeministri Edi Rama u shpreh sot se “nëse ka shumë më tepër vend për gratë dhe për vajzat në të gjitha nivelet e vendimmarrjes, por edhe në të gjitha hapësirat e jetës aktive, kjo i detyrohet në radhë të parë një emri të vetëm, Partisë Socialiste të Shqipërisë”.
Në Ditën Ndërkombëtare të Gruas, kryeministri Edi Rama zhvilloi sot një takim me gratë dhe vajzat nga i gjithë vendi.
Rama theksoi se i gjithë progresi në zgjerimin e hapësirës për gratë është në fakt pasqyrë kuptimplotë e vetë progresit që ka bërë Shqipëria.
“Për këtë ne socialistët shqiptarë i kemi të gjitha arsyet të jemi më krenarë se gjithë të tjerët”, tha Rama.
Kryeministri citoi Dora D’Istrian, kur shprehej se “të luftosh dhe të fitosh për gratë do të thotë të luftosh e fitosh edhe për burrat”.
Rama tha se sa më të forta të jenë gratë aq më të fortë janë burrat dhe sa më të dobëta të jenë gratë aq më e dobët është fuqia në dukje e burrave.
“Por midis dy fuqive ka një dallim shumë të madh. Kur gratë janë të forta burrat janë të fortë por edhe të urtë në kuptimin e marrjes së kohës për të thënë fjalën e fundit. Kur gratë janë të dobëta burrat janë të dobët po shumë agresiv”, shtoi ai.
Kryeministri theksoi se duke zgjeruar hapësirën për gratë, duke i fuqizuar dhe dhënë më shumë vend në të gjitha nivelet e përfaqësimit, faktikisht ne të gjithë së bashku luftojmë për t’i bërë burrat më të vetëdijshëm, më të arsyeshëm dhe më të urtë.atsh.
