Policia e Gjilanit ka ftuar të gjithë qytetarët të cilët kanë pranuar shërbime shëndetësore, konsulta, terapi apo medikamente nga Arianit Sllamniku të paraqiten në policia për intervisitim.
Policia thotë se përmes Njësisë së Hetimeve Rajonale në Gjilan, me autorizim të Prokurorisë së Shtetit, është duke ndërmarrë veprime fillestare hetimore në drejtim të veprave penale ‘’Ushtrim të kundërligjshëm të veprimtarisë mjekësore ose farmaceutike’’ dhe ‘’Eksperimente të kundërligjshme mjekësore dhe testime të barnave’’ me qëllim të verifikimit të rrethanave të rasteve të dyshuara që ndërlidhen me trajtim shëndetësor të ofruar nga personi Arianit Sllamniku.
“Në kuadër të këtyre veprimeve, Drejtoria Rajonale e Policisë në Gjilan fton të gjithë qytetarët të cilët kanë pranuar shërbime shëndetësore apo konsulta me përdorim të ndonjë terapie apo medikamenti nga personi në fjalë dhe që konsiderojnë se janë dëmtuar në çfarëdo forme, qoftë materiale apo shëndetësore, që të paraqiten në ambientet e Njësia e Hetimeve Rajonale në Gjilan për intervistim me qëllim të zbardhjes të rrethanave të rastit”, thuhet në një njoftim të policisë, transmeton Klankosova.tv.
Arianit Sllamniku është ndaluar tashmë për 48 orë. Lajmin e ka konfirmuar për Klan Kosovën, kryeprokurori i Gjilanit Arben Kadriu.
Raportimi i Klan Kosovës, konkretisht i KIKS Kosova vuri në lëvizje mekanizmat shtetëror.
Sllamniku, edhe pse nuk është mjek, pretendon se e ka ilaçin për “shërimin” e autizmit tek fëmijët.
