Ndonëse ka kaluar një muaj e gjysmë, Gjykata Kushtetuese ende nuk ka marrë një vendim në lidhje me kërkesën e AAK-së, për vlerësimin e kushtetutshmërisë së propozimit për formimin e Komisionit për Votim të Fshehtë për Zgjedhjen e Kryeparlamentarit të Kosovës.
Nga ky institucion kanë thënë për Radio Kosovën se janë duke e trajtuar rastin, por nuk kanë dhënë ndonjë afat për vendimmarrje. Nga AAK dhe shoqëria civile thonë se Kushtetuesja është brenda afateve ligjore dhe presin që vendimi i saj, t’i hapë rrugë konstituimit të Kuvendit.
Zyrtarë të Gjykatës Kushtetuese, kanë bërë të ditur për Radio Kosovën se janë duke e trajtuar seriozisht kërkesën e Aleancës për Ardhmërinë e Kosovës, për vlerësimin e kushtetutshmërisë së propozimit për formimin e Komisionit për Votim të Fshehtë për Zgjedhjen e kryeparlamentarit të Kosovës. Por, ata nuk kanë përmendur ndonjë afat për vendimmarrje, duke thënë se për këtë publiku do të njoftohet me kohë.
Juristi Ehat Miftaraj nga Instituti i Kosovës për Drejtësi, thotë për Radio Kosovën se, edhe për kundër urgjencës që mund të ketë trajtimi i rastit të iniciuar nga AAK-ja, Kushtetuesja është brenda afateve ligjore në trajtimin e rastit.
“Gjykata Kushtetuese ende është brenda një afati të arsyeshëm kohorë, sepse ligji i aplikueshëm përcakton që kushtetuesja të vendosë brenda një afati prej 60 ditësh, nga pranimi i kërkesës. Por, me rëndësi është që Gjykata Kushtetuese të sigurohet që këtë rast ta trajtojë në mënyrën më profesionale të mundshme, të ketë konsultime dhe të marrë opinione nga gjykatat simotra apo nga Komisioni i Venecias, për praktikat e ngjashme, në mënyrë që, pastaj, çfarëdo vendimi që të merret, të jetë i bazuar dhe të ofrojë siguri juridike lidhur me kërkesën e parashtruar nga AAK-ja”, tha ai.
Edhe deputetja e AAK-së, Time Kadrijaj, po ashtu thotë se kushtetuesja është brenda afateve. Ajo beson se vendimi i Gjykatës Kushtetueses mund të ofroj zgjidhje për tejkalimin e ngërçit të moskonstituimit të Kuvendit të Kosovës.
“Për shkak të situatës së krijuar ata duhet të kenë parasysh se duhet me e bërë një zgjidhje. Pastaj është obligim i deputetit me votuar, mos me votuar, me abstenuar, apo mos me marrë fare pjesë në votim, sepse deputeti nuk i nënshtrohet asnjë presioni. Ne po presim se cila do të jetë përgjigja e kushtetueses, e pastaj do të shohim si do të veprojmë”, tha Kadrijaj.
Një përpjekje e radhës, e 37-ta më radhë, për konstituimin e Kuvendit të Kosovës, duke votuar për zgjedhjen e deputetes Albulena Haxhiu për kryeparlamentare, do të mbahet këtë të mërkurë.
