Zyrtarët e entitetit të Bosnje-Hercegovinës, Republika Serbe ende e trajtojnë Milorad Dodikun, ish-presidentin e RS-së, si president, dhe në përputhje me këto veprime të paligjshme po përgatisin edhe hapat e ardhshëm.
Është paralajmëruar një referendum për 25 tetor, në të cilin qytetarëve të RS-së do t’u bëhen pyetje nëse e pranojnë aktgjykimin kundër Dodikut dhe nëse i pranojnë vendimet e imponuara nga përfaqësuesi i lartë në Bosnjë e Hercegovinë, Christian Schmidt.
Përveç kësaj, janë duke u paralajmëruar edhe hapa të tjerë, si referendumi për vetëvendosje, dhe kjo është pjesë e strategjisë së përgjithshme të pushtetit aktual në RS.
E gjithë kjo do t’i mundësojë Dodikut të vazhdojë të jetë në qendër të vëmendjes politike, edhe pse mandati i është marrë dhe ligjërisht nuk ka asnjë kompetencë, raporton klix.ba.
Në këtë drejtim, ministri i policisë së RS-së, Sinisha Karan, i cili është një nga bashkëpunëtorët më të afërt të Dodikut, deklaron se populli në këtë entitet tashmë ka vendosur për vetëvendosje dhe se është vetëm çështje kohe. Natyrisht, sipas praktikës së deritanishme, ky moment mund të shtyhet pafundësisht.
“Populli serb nuk është vasal i askujt. Ne e krijuam Republikën Serbe mbi bazën e të drejtës universale të popujve për vetëvendosje, e mbrojtëm me gjak dhe e ruajtëm në paqe. E pranuar si palë gjatë negociatave në Gjenevë dhe New York, e pastaj edhe në Dejton, Republika Serbe është verifikuar ndërkombëtarisht dhe këtë askush nuk mund të na e marrë”, tha ai.
“Pikërisht vullneti i popullit dhe sovraniteti (i brendshëm) i Republikës Serbe brenda bashkësisë shtetërore të Bosnjë e Hercegovinës, i bazuar në të drejtën ndërkombëtare, na jep forcë të deklarojmë qartë: çështja e vetëvendosjes së Republikës Serbe nuk është më një vendim që duhet marrë, sepse populli serb tashmë ka vendosur. Është vetëm çështje kohe kur ky vendim do të zbatohet në kapacitet të plotë”, përfundoi Karan.
