Sulmuesi polak i Barcelonës, Robert Lewandowski, ka zgjeruar pronat e tij në Mallorca duke blerë një vilë luksoze me vlerë rreth 11 milionë euro.
Prona ndodhet në Camp de Mar, në jugperëndim të Ishullit, dhe ofron 700 metra katrorë hapësirë të banueshme, gjashtë dhoma gjumi, pishinë, disa tarraca dhe një pamje të përhershme nga deti.
Mediet gjermane ‘Bild’ dhe ‘RTL’ raportojnë se agjenti imobiliar, Marcel Remus, ishte ndërmjetësi i këtij transaksioni. Remus ndau lajmin në Instagram, duke shkruar:
“Sapo kam shitur njërën nga pronat më të bukura në një vendndodhje absolutisht të privilegjuar në Camp de Mar. Faleminderit blerësit dhe shitësit!”
Megjithatë, Lewandowski nuk e ka konfirmuar ende blerjen.
Nuk është prona e tij e parë në ishull
Lewandowski posedon një tjetër vilë në Santa Ponça, të cilën e bleu në mes të vitit 2021. Kjo pronë ka një vlerë prej rreth 3.5 milionë eurosh, me 400 metra katrorë hapësirë banimi dhe 1.200 metra katrorë tokë.
Duket se sulmuesi polak po forcon lidhjet e tij me Mallorca-n, një destinacion i preferuar për shumë ‘yje’ të futbollit.
