Një sulm izraelit ndaj centralit të vetëm bërthamor operativ të Iranit në Bushehr do të shkaktonte katastrofë të shkallës së Çernobilit, paralajmëroi të enjten kreu i kompanisë shtetërore të energjisë bërthamore të Rusisë.
“Nëse kryhet sulmi… do të jetë një katastrofë e krahasueshme me Çernobilin”, tha drejtori ekzekutiv i Rosatom, Alexey Likhachev.
Bushehri ndodhet në bregdetin e Gjirit Persik dhe është i vetmi central bërthamor operativ i Iranit.
Bëhet e ditur se Rusia ndihmoi Iranin të ndërtonte centralin dhe një pjesë e stafit janë rusë, shkruan Reuters, përcjell Telegrafi.
Një zëdhënës ushtarak izraelit tha se Izraeli kishte goditur centralin, por një zyrtar tha shpejt se ky ishte një “gabim” dhe se ai nuk mund të konfirmonte dhe as të mohonte se centrali i Bushehrit ishte goditur.
Scott Roecker, nënkryetar për Sigurinë e Materialeve Bërthamore në Iniciativën e Kërcënimit Bërthamor, tha se një sulm ndaj centralit të Bushehrit “do të rezultonte në shpërndarjen e një sasie të madhe rrezatimi”
