Sekretari i përgjithshëm i NATO-s, Jens Stoltenberg, ka përshëndetur legjislacionin e ri të Suedisë kundër terrorizmit, i cili përfshin PKK-në, duke e përshkruar atë si një hap përpara në luftën e vendit kundër terrorizmit, raporton Anadolu.
“Türkiye ka shqetësime legjitime të sigurisë dhe unë përshëndes që Suedia ka ecur përpara në luftën kundër terrorizmit, përfshirë PKK-në, duke paraqitur legjislacionin e ri terrorist dhe duke forcuar bashkëpunimin kundër terrorizmit me Ankaranë”, tha Stoltenberg në një konferencë të përbashkët për media me kryeministrin suedez, Ulf Kristersson.
Ai shtoi se gjithashtu përshëndet atë që “Suedia po siguron që nuk ka kufizime në eksportet e armëve në Türkiye”.
Stoltenberg dhe Kristersson diskutuan finalizimin e anëtarësimit të Suedisë dhe Finlandës në NATO, pasi sipas shefit të NATO-s, “kjo është një përparësi kryesore dhe po bëhet përparim”.
Shefi i NATO-s gjithashtu tha se është i kënaqur që presidenti turk, Recep Tayyip Erdoğan, pranoi të rifillojë negociatat, duke iu referuar një takimi trepalësh që do të zhvillohet të enjten në Bruksel, ku palët do të diskutojnë nëse kërkesat e memorandumit trepalësh janë përmbushur ose jo.
Ai tha se po ashtu është inkurajuese që parlamenti hungarez ka filluar të debatojë për ratifikimin e aplikimeve të Suedisë dhe Finlandës në NATO, si dhe shtoi se ai parashikon që procedura të përfundojë së shpejti.
Kristersson, nga ana e tij, tha se në javët e ardhshme Suedia do të bëhet “plotësisht e gatshme” për t’u bashkuar me NATO-n pas ratifikimit nga Türkiye dhe Hungaria, siç tha ai, që do të thotë se “Suedia do të punojë me të njëjtin ritëm si Finlanda”.
Ai gjithashtu tha se Suedia në Bruksel do të prezantojë në detaje se çfarë masash janë marrë që nga takimi në Madrid.
Qershorin e vitit të kaluar, Türkiye dhe dy vendet nordike nënshkruan një memorandum në një samit të NATO-s në Madrid për të adresuar shqetësimet legjitime të sigurisë së Ankarasë, duke i hapur rrugën anëtarësimit të tyre përfundimtar në aleancën ushtarake.
Memorandumi trajton shqetësimet e Türkiyes, përfshirë eksportin e armëve dhe luftën kundër terrorizmit.
Vetëm Hungaria dhe Türkiye ende nuk i kanë ratifikuar kërkesat e Suedisë dhe Finlandës për përfshirje në NATO.
Legjislacioni i ri kundër terrorizmit i Suedisë do të shënjestrojë financimin, ndihmën dhe përhapjen e grupeve terroriste. Udhëtimi jashtë vendit për t’u bashkuar ose për të ndihmuar një grup terrorist gjithashtu do të penalizohet nëse ligji hyn në fuqi.
Ankaraja ka kërkuar nga Stokholmi që të ndërmarrë veprime konkrete për të luftuar grupin terrorist PKK dhe FETO-në terroriste që qëndron pas tentativës së dështuar të vitit 2016 për grusht shtet në Türkiye.
Nëntorin e kaluar, Suedia miratoi një ligj kundër terrorizmit, duke shpresuar se Ankaraja do ta miratojë aplikimin e Stokholmit për t’u bashkuar me NATO-n, por Türkiye thotë se ligjet e miratuara nuk janë të mjaftueshme dhe se asgjë nuk është bërë për të ndaluar aktivitetet e grupeve terroriste.
Pasi Türkiye ishte e pakënaqur me qasjen e paqartë të Suedisë, Ankara prolongoi një takim trepalësh me Suedinë dhe Finlandën lidhur me aplikimet e tyre për t’u anëtarësuar në NATO, pasi autoritetet suedeze lejuan një politikan danez të ekstremit të djathtë të djeg një kopje të Kuranit jashtë ambasadës turke në Stokholm më 21 janar.
