Një turist ka humbur jetën në jug të Islandës pas shembjes së akullit gjatë një vizite që po bënte në një akullnajë. Këtë e raportojnë mediat lokale. Një turist tjetër u plagos dhe është dërguar në spital, ndërsa dy të tjerë rezultojnë të zhdukur.
Sipas asaj që raportohet, i plagosuri nuk është në rrezik për jetën. Ekipet e shpëtimit kanë pezulluar deri në mëngjes kërkimin për të zhdukurit në akullnajë për shkak të kushteve të vështira.
Akulli u shemb ndërsa grupi prej 25 personash po vizitonte një shpellë akulli së bashku me një guidë të dielën. Ekipet e shpëtimit po punojnë në kushte tepër të vështira në terren.
“Është e vështirë për të përdorur pajisjet tona. Është terren shumë i vështirë”, thekson shefi i policisë Svein Runarson. Mediat në Islandë raportojnë se 200 persona janë angazhuar në operacionet e shpëtimit.
