Me ceremoni solemne në Amfiteatrin e Bibliotekës Universitare është shënuar 53 vjetori i themelimit të Universitetit të Prishtinës “Hasan Prishtina”, raporton Anadolu.
Në këtë ceremoni kanë marrë pjesë kryeministri i Kosovës, Albin Kurti, udhëheqës të institucioneve të arsimit, rektorë, akademikë, profesorë, ambasadorë të huaj dhe studentë.
Kryeministri i Kosovës, Albin Kurti, tha se historia e Universiteti i Prishtinës (UP) e ndan historinë e Kosovës në dy epoka.
Kurti tha se epoka pa universitet ka marrë fund në vitin 1970, ndërsa sipas tij, periudha pas themelimit të universitetit shkon gjithnjë duke u ngritur.
“Nuk ka akademik, intelektual a politikan jo vetëm nga Kosova, por edhe nga Maqedonia e Veriut dhe Lugina e Preshevës, nga Sanxhaku dhe Mali i Zi, që nuk ka kaluar nëpër bankat e Universitetit të Prishtinës. As demonstratat qytetare e as luftën çlirimtare nuk mundemi as t’i mendojmë, e lëre më t’i studiojmë a analizojmë pa Universitetin e Prishtinës. E, sot në shtetësinë dhe pavarësinë e republikës sonë, nuk ka institucion me rol dhe kontribut më të madh se Universiteti i Prishtinës”, theksoi Kurti.
Rektori i Universitetit të Prishtinës, Qerim Qerimi, tha se 53 vjet në ekzistencën e UP-së mund të portretizohen si “historia vetë”.
Qerimi tha se në kohën që po hasen ndryshime të shpejta, duhet një rishikim i pozicionit në mënyrë “që të vazhdojmë të jemi burim i fuqisë dhe qëndrueshmërisë sociale, politike dhe ekonomike”.
“Është detyra jonë themelore që të ruajmë atë se çfarë Universiteti i Prishtinës ka qenë dhe për çfarë ka qëndruar për mbi 5 dekada me radhë, derisa përshtatemi për të përmbushur kërkesat e kohëve që po ndryshojnë”, theksoi Qerimi.
Kuvendi themelues i Universitetit të Prishtinës u mbajt më 13 shkurt të vitit 1970, kurse dy ditë më vonë, më 15 shkurt 1970, u mbajt edhe mbledhja solemne e Kuvendit. Kështu, data e 15 shkurtit u shpall Dita e Universitetit të Prishtinës.
Në përbërje të Universitetit të Prishtinës të posathemeluar ishin disa fakultete me seli në Prishtinë: Fakulteti Filozofik, Fakulteti Juridiko-Ekonomik, Fakulteti Teknik dhe Fakulteti i Mjekësisë. Aktualisht, Universiteti i Prishtinës i ka 14 fakultete./aa
