Një marrëveshje paqeje që do të kërkonte që Kievi të pranonte shkëmbimin e territorit ukrainas me Rusinë, jo vetëm që do të ishte thellësisht e papëlqyeshme, por edhe e paligjshme sipas kushtetutës së vendit.
Kjo është arsyeja pse presidenti ukrainas, Volodymyr Zelenskyy e ka refuzuar kategorikisht çdo marrëveshje me Moskën që mund të përfshijë dorëzimin e tokës, pasi presidenti amerikan, Donald Trump, sugjeroi se një lëshim i tillë do të ishte i dobishëm për të dyja palët, përpara takimit të tij të premten me presidentin rus, Vladimir Putin, në Alaskë, raporton AP.
Zelenskyy tha gjatë fundjavës se Kievi “nuk do t’i japë Rusisë asnjë shpërblim për atë që ka bërë” dhe se “ukrainasit nuk do t’ia japin tokën e tyre pushtuesit.” Këto deklarata erdhën pasi Trump tha se një marrëveshje paqeje do të përfshinte shkëmbimin e territoreve ukrainase nga të dyja palët “për të mirën e të gjithëve.”
Për Zelenskyy-n, një marrëveshje e tillë do të ishte katastrofë për presidencën e tij dhe do të shkaktonte reagim të fortë publik pas më shumë se tre vitesh gjakderdhje dhe sakrifice nga ukrainasit. Për më tepër, ai nuk ka as autoritetin për ta miratuar një marrëveshje të tillë, pasi ndryshimi i kufijve të vitit 1991 të Ukrainës bie ndesh me kushtetutën e vendit.
