Interi e mbyll muajin shkurt me një fitore të vuajtur, por shumë të rëndësishme, duke lënë pas një periudhë të vitit që tradicionalisht ka qenë e vështirë, që kur Inzaghi është në pankinë (përjashtuar sezonin e kaluar).
Në kampionat, zikaltrit kanë marrë vetëm 7 pikë nga 15 të mundshme, falë dy fitoreve (ndaj Fiorentina dhe Genoa), një barazimi (Milanit) dhe dy humbjeve (Fiorentina dhe Juventus).
Kundër Genoa-s, skuadra kampione italiane zhvilloi ndoshta pjesën e parë më të dobët të sezonit, duke mos krijuar asnjë rrezik për portën e Lealit. Skuadra u përmirësua në pjesën e dytë, sidomos pas futjes së Calhanoglu dhe Zielinskit, të cilët sollën qetësi dhe cilësi në mesfushë. Pikërisht nga një goditje këndi e turkut erdhi edhe goli i fitores i Lautaros, që shënoi golin e tij të 10-të në kampionat, ndërsa më herët Barella kishte goditur një tjetër shtyllë, e shtata në këtë periudhë.
Skuadra e Inzaghit ka humbur pak nga shkëlqimi që kishte disa javë më parë dhe dëmtimet në sulm nuk e ndihmojnë aspak situatën. Thuram, i cili ka shumë mundësi të mungojë edhe kundër Lazios në Kupën e Italisë, është tashmë i dëmtuar, ndërsa edhe Correa është ndalur për shkak të një problemi në gju.
Argjentinasi e shpërdoroi mundësinë që i dha Inzaghi, duke u shuar shumë shpejt në lojë dhe mos arritur të lidhë mesfushën me sulmin në 20 metrat e fundit. Në vend të tij u aktivizua Taremi, i cili tregoi si cilësitë, ashtu edhe dobësitë e tij: përkushtimi dhe puna për ekipin nuk mungojnë, por sulmuesi iranian vazhdon të ketë probleme serioze me konkretizimin para portës.
Në 20 ditët e ardhshme, Interi do të përballet me një periudhë vendimtare mes Kupës së Italisë (të martën ndaj Lazios), kampionatit (me fillim nga supersfida e së shtunës ndaj Napolit) dhe Champions League (ndeshja e 1/8 finale kundër Feyenoordit). Sommer do të mungojë, por Martinez ka treguar në debutimin e tij në kampionat se është më shumë se një portier rezervë.
Rikuperimi i plotë i Acerbit është gjithashtu një lajm i madh për mbrojtjen, me veteranin që u shfaq i sigurt dhe i saktë në disa ndërhyrje vendimtare. Ndërkohë, Bastoni dhe Dimarco po përpiqen të rikuperojnë forcat pas javëve të ngarkuara, duke e bërë edhe më të rëndësishëm kontributin e lojtarëve të stolit për të kaluar këtë moment kyç të sezonit.s.n.
