Fabrika e ujit në Zubin Potok, e cila vetëm deri para pak ditësh ishte në kontroll të strukturave paralele, është marrë nën menaxhin nga Kompania Rajonale e Ujësjellësit “Mitrovica”.
Institucionet komunale paralajmërojnë se fat i njëjtë e pret edhe kompaninë e mbeturinave “Standard”.
Flamuri i Kosovës është vendosur i pari.
Më pas edhe pllaka që tregon se se ky vend, është nën kontroll të institucioneve të Republikës së Kosovës.
Në thellësi të komunës së Zubin Potokut, gjendet fabrika për prodhimin e ujit, nga e cila furnizohen të gjithë qytetarët e kësaj zone veriore të vendit.
Ajo është marrë nën kontrollin e shtetit e cila deri më tani ka qenë e menaxhuar nga strukturave paralele serbe.
Ditë më parë, Policia e Kosovës asistoi zyrtarët e Kompanisë Rajonale të Ujësjellësit “Mitrovica”, të cilët kërkuan kthimin e kësaj fabrike, pas një marrëveshje me komunën e Zubin Potokut.
“Të gjitha pronat edhe institucionet të cilat i takojnë qytetarëve duhet të jenë nën menaxhimin e institucioneve edhe brenda kornizave ligjore të Republikës së Kosovës. Jo të shfrytëzohen nga grupet e ndryshme ose teke të ndryshme, shërbime të ndryshme. Kështu që, krejt kjo çfarë është, është mirë sepse hyn brenda kornizave ligjore të Republikës së Kosovës”, ka thënë Izmir Zeqiri, kryetar i komunës, Izmir Zeqiri.
Ai shtoi se KRU “Mitrovica” tashmë janë duke punuar në këtë fabrikë me ekipet e saj.
“ I ka ekipet, është e kompletuar me ekipe teknike do të thotë të specializuar për furnizim, kontrolle të ujit, rrjeteve të ujësjellësit. Drejtoria regjionale e ka personelin e duhur”, thotë Zeqiri.
E fatin e fabrikës për prodhimin e ujit, kryesuesi i Kuvendit Komunal të Mitrovicës së Veriut, Nexhat Ugljanin, thotë se do ta ketë edhe një kompani tjetër.
“Ne po presim kërkesat e kryetarit, të cilat do të vijnë, përmes Kuvendit si ato objektet të Ujësjellësit por janë edhe disa objekte të tjera të cilat duhet të kryhen, sigurisht po folim për “Standardin” e cila po funksionon për mbeturinat që është kompani e mbeturinave. Është funksionalizimi që ne në kuadër të Kuvendit do t’i sjellim vendimet që çdo objekt të jetë në kuadër të Komunës së Mitrovicës së Veriut”, ka thënë ai.
Ditëve të fundit, Policia e Kosovës ka asistuar inspektorët e komunës së Mitrovicës, edhe në rikthimin e disa objekteve të tjera që shfrytëzoheshin nga strukturat paralele.
