Simone Inzaghi është i kënaqur me fitoren 2-0 ndaj Feyenoordit, e cila e afron shumë Interin me çerekfinalet e Champions League.
“Djemtë bënë një paraqitje të shkëlqyer, nuk ishte e lehtë të luaje në një stadium të tillë ku e dinim që do të duhej të vuanim,” tha trajneri i Interit për ‘Amazon Prime Video’.
“Skuadra nuk vuajti shumë, por kur ishte nevoja, qëndruam të bashkuar. Tani e dimë që kemi një ndeshje kthimi pas gjashtë ditësh dhe ndërkohë një sfidë në kampionat. Janë situata të rrezikshme, por jam shumë i kënaqur.”
Asllani dhe Zielinski: “Bënë saktësisht atë që doja. Nuk kam pasur kurrë dyshime për ta. Sigurisht, trajneri duhet të marrë vendime çdo ditë, jo vetëm gjatë ndeshjeve. Calhanoglu dhe Mkhitaryan luajtën para tri ditësh kundër Napolit, ndaj bëra disa ndryshime pa e prishur ekuilibrin e skuadrës. Do të vazhdoj në këtë mënyrë, sepse jemi të lumtur që luajmë kaq shumë ndeshje dhe duhet të vazhdojmë kështu.”
Starti i vështirë i ndeshjes: “Duhet të marrim parasysh edhe cilësinë e kundërshtarit. Feyenoord luante me katër sulmues dhe kur pamë formacionet, e kuptuam që Paixao nuk do të qëndronte në krah, por do të hynte në qendër. Në fillim nuk ishim gjithmonë në pozicionet e duhura dhe nuk qarkulluam topin siç duhej. Kur luan në këto stadiume kundër këtyre skuadrave, mund të vuash. Më pas, lojtarët e menaxhuan mirë situatën dhe folëm qartë për këtë. Dy golat na ndihmuan të fitojmë një ndeshje të rëndësishme, por e dimë që kemi fituar vetëm pjesën e parë. E dyta do të luhet të martën në ‘San Siro.’
Emergjenca e dëmtimeve dhe Bastoni: “Alessandro u vu në shërbim të skuadrës, bëri një ndeshje të shkëlqyer duke u alternuar me Acerbin në krahun e majtë. Po flasim për një mbrojtës të nivelit botëror, i cili e kuptoi nevojën e ekipit. Kjo është ajo që ne trajnerët kërkojmë.”
Të dëmtuarit: “Carlos Augusto mund të provojë të jetë gati për Monza-n, ndoshta edhe Zaleëski. Sa për Darmian dhe Dimarco, nuk e di nëse do të rikuperohen para pauzës. Por kemi besim.”s.n.
