Nga dje në ora 17:00, vetëm një orë pasi Komisioni Qendror i Zgjedhjeve, shpalli rezultatet përfundimtare të zgjedhjeve të 9 shkurtit, ka filluar rrjedhja e afatit prej 48 orësh për ankesa, e drejtë kjo e të gjitha subjekteve politike e kandidatëve për deputetë të cilët në PZAP e në Gjykatën Supreme mund të deponojnë ankesa kundër rezultateve përfundimtare të shpallura nga KQZ-ja.
Për t’u bërë certifikimi i rezultateve që do t’i hapte rrugë konstituimit të institucioneve të reja të dala nga zgjedhjet, KQZ-ja duhet të presë përfundimin e këtyre procedurave të parapara me ligj.
“Me shpalljen e rezultateve përfundimtare të zgjedhjeve, nuk përfundon procesi zgjedhor, pasi sipas nenit 106 të Ligjit për Zgjedhjet e Përgjithshme mund të parashtrohen ankesat në PZAP dhe nëse pala është e pakënaqur me vendimin e PZAP-it mund të vazhdojë ankimimin në Gjykatën Supreme. Vetëm pasi të përfundojë vendimmarrja nga këto institucione dhe zbatimi i këtyre vendimeve nga KQZ, atëherë KQZ-ja mund të procedojë me certifikimin e rezultateve përfundimtare”, tha për RTKlive, zëdhënësi i KQZ-së, Valmir Elezi.
E sipas një përllogaritjeje që kishte bërë Eugen Cakolli nga rrjeti i Organizatave Demokracia në Veprim e gjithë kjo pritet të marr kohë deri në 12 ditë, meqë, sipas tij, qindra ankesa pritet të deponohen në PZAP e Supreme.
“Prej tyre, gjithsej 6 ditë janë të parapara në PZAP dhe 6 të tjera në Gjykatën Supreme. Kjo, pa llogaritur vendimet që mund të marrin këto institucione, të cilat potencialisht mund të ndikojnë në certifikimin e rezultateve”, kishte thënë, Cakolli.
Në fakt, KQZ-ja sipas planit të aktiviteteve që e kishte miratuar vetë në gushtin e vitit të shkuar, i kishte përcaktuar vetës 5 marsin si datën më të largët për shpalljen e rezultateve përfundimtare e 18 marsin për certifikimin e tyre.
Por, vetë kreu i KQZ-së Kreshnik Radoniqi, tha se vonesat për shpalljen e rezultateve përfundimtare janë për disa arsye, e një nga to, tha ai, ka të bëjë me zbatimin e ndryshimeve të shumta ligjore, të cilat kanë shtuar detyra për KQZ-në.
Ndërkohë vetëm pas pak muajsh, në vjeshtën e këtij viti, Kosova pritet t’i nënshtrohet një tjetër procesi zgjedhor,atij të zgjedhjeve lokale.
E sipas Radoniqit, këto zgjedhje mund të jenë mësim për ato lokale që pritet të mbahen, meqë mund të ndihmojë në përmirësimet e duhura./rtk
