Autorësinë e sulmit terrorist në Banjksë të Zveçanit e pranoi, por kryeterroristi Millan Radojçiq për këtë krim ende nuk është ndëshkuar.
Radojiçiq i cili më 24-shtator të vitit 2023 sulmoi policinë e Kosovës ku mbeti i vrarë rreshteri, Afrim Bunjaku, po i shmanget drejtësisë në Beogradin zyrtar.
Por, kryeterroristi tashmë dyshohet se ka kaluar pasurinë e tij në Rusi.
Ish deputeti serb i Partisë Progresive Serbe, Dragan Sormaz thotë që një informacion i tillë ka qarkulluar në mediet serbe, pastaj është zhdukur nga publiku.
Përveç transferimit të kapitalit, ka dyshime që edhe vetë Radojiçiq ka bërë përpjekje të shkoj në kryeqytetin rus, por atje i është ndaluar hyrja nga autoritetet.
“Një informatë shumë e shkurtër që është shfaqur në disa media dhe është zhdukur nga publiku në Serbi, është që Radojiçiq ka hapur disa firma në Moskë, ka kaluar kapitalin atje, por kur është dashur ai të shkonte atje, me gjasë rusët nuk e kanë lejuar të shkojë. Sa është kjo e saktë nuk e di, por kjo është shfaqur në një moment nëpër mediet në Serbi. Nëse është e saktë është një tregues që ndoshta ata në këto bisedime me Trumpin, kanë pozitat e caktuara që priten ndaj Kosovës dhe Serbisë”, tha ish-deputeti i SN-së.
Ish-deputeti i partisë së presidentit serb, Aleksandër Vuciq nuk pret që Prokuroria në Beograd të ngrit aktakuzë ndaj terroristit Radojiçiq.
“Ai është i lirë, dhe pavarësisht që e kërkon INTERPOL-i ata nuk e dërgojnë.
Prokurori ka thënë se me gjasë s’do të ketë akuzë kundër tij, sepse nuk ka dëshmi. Kjo është e fundit që kam dëgjuar nga prokurori, dhe prej 1 nëntorit kjo ka qenë temë dhe është folur për këtë nga prokuroria. Këtë e kam përcjell unë, e kam parë që ka ndodhur, por si t’u them, as nuk kam pritur që në Serbi do të ngrihet akuzë kundër tij”, tha ai.
Në anën tjetër, gazetari dhe drejtori i televizionit “ Nova” në Serbi, Slobodan Georgiev, thotë për Tëvë1 se Radojiçiq po vazhdon të endet vërdallë në Kapaonik dhe Beograd.
Ndonëse Radojiçiq dhe vëllezërit Veselenoviq janë në listë të zezë të Shteteve të Bashkuara të Amerikës, Georgiev shton se ky fakt është heshtur në Beograd.
“Nuk ka asnjë proces kundër Milan Radojçiqit. Mos të mashtrohet askush me këtë. Të dëshmohet që Serbia ka një shtet ligjor, e kemi marr në pyetje, janë vetëm farsë. Nuk ka asnjë proces kundër Milan Radojçiqit, të gjitha punët e tija vazhdojnë, ai jeton, mendoj lart në Kopaonik, dhe këtu në Beograd, ndërmjet këtyre dy adresave. Atë Ministria Amerikane e Financave e ka cilësuar si pjesë të grupit të krimit të organizuar bashkë me vëllezërit Veselinoviç. Ky fakt është heshtur plotësisht në Serbi, nga ana e pushtetit, nga gjykata, nga prokurori. E prokuroria”, tha gazetari Slobodan Georgiev.
Në Kosovë, institucionet e Drejtësisë por edhe ekzekutivi kanë kërkuar nga Bashkimi Evropian dhe SHBA-të, ekstradimin e Millan Radojiçiq për të dalë para drejtësisë për sulmin e 24-shtatorit në Banjskë të Zveçanit.
