Pas një muaji fushatë elektorale, Shqipëria është në heshtje zgjedhore sot, duke i lënë vendin përgatitjeve të fundit për ditën e nesërme, kur qytetarët do të shkojnë në kutitë e votimit për të zgjedhur qeverinë e ardhshme për katër vitet e ardhshme.
Të dielën, më 11 maj, qytetarët shqiptarë do të vendosin se kush do të drejtojë vendin në periudhën e ardhshme. Mbrëmë, partitë kryesore, PS dhe PD, mbyllën fushatën zgjedhore në Tiranë me dy aktivitete të veçanta.
Partia Socialiste zhvilloi mitingun përmbyllës në “Parkun Olimpik”, ndërsa Partia Demokratike u pozicionua në “Bulevardin e Ri” të kryeqytetit. Gjatë këtyre ngjarjeve, liderët e të dy forcave politike, Edi Rama dhe Sali Berisha, dhanë mesazhet e tyre për qytetarët, duke i bërë thirrje për pjesëmarrje dhe përzgjedhje të drejtë.
Një risi e rëndësishme në këto zgjedhje është vota e diasporës, ku 245.935 emigrantë shqiptarë janë regjistruar për të marrë pjesë në zgjedhje dhe për të votuar për Parlamentin e ri. Në garë për 140 ulëse në Kuvendin e ri janë 11 subjekte apo koalicione politike, të cilët kanë vendosur lista të hapura dhe të mbyllura për kandidatët, shkruan euronews.al. Çdo subjekt ka 186 kandidatë të regjistruar në listën e votimit të Komisionit Qendror të Zgjedhjeve , ku 46 prej tyre janë nga lista e mbyllur.
