Është një supë fantastike, që të kujton fëmijërinë, atëherë kur nëna e përgatiste menjëherë kur përfshiheshim nga ethet apo gripi.
E shëndetshme, e lehtë dhe plot shije, receta e supës së prerë me vezë e limon vijon të jetë një ndër traditat më fantastike të kuzhinës shqiptare.
Kjo supë, krahas vlerave kurative që ka kundër gripit dhe të ftohurës, është fantastike për të hapur oreksin e nepsin në vaktin e plotë të drekës por mund të konsumohet edhe gjatë vaktit të darkës.
Shoqërohet në mënyrë të shkëlqyer më sallatë të freskët jeshile, marinuar me limon e vaj ulliri. Por edhe byrekë të ndryshëm, sidomos ata të përgatitur me gjizë apo me hithra e lakra të egra.
AgroWeb.org u sugjeron më poshtë recetën e përgatitjes së kësaj supe fantastike tipike shqiptare krejt lehtë në shtëpi.
Përgatitja e Supës së Prerë me Vezë e Limon
Përbërësit
(Përbërësit më poshtë janë për 4-5 persona)
1.5 litra lëng mishi apo kockash
4 lugë gjelle oriz
Një kokërr vezë
50 gr ose dy lugë gjelle gjalpë të freskët
Lëngu i një gjysme kokrre limoni
Majdanoz
Piper i zi
Përgatitja
Si fillim zjejmë mishin apo kockat përreth 2 orë. Në mënyrë që lëngu të marrë të gjitha vlerat e duhura të mishit apo kockave.
Në lëngun e mishit ose në ujë të valuar hedhim oriz të pastruar e të larë dhe e lëmë të zjejë në zjarr të ngadalshëm për 25-30 minuta.
Kur supa është gati e heqim nga zjarri, e lëmë të ftohet. Në momentin që është ende e vakët, e presim vezë dhe limon.
Për këtë, në një tas prej porcelani hedhim të verdhën e vezës ose një vezë të tërë, e rrahim mirë dhe më pas i shtojmë lëngun e limonit.
Këtë masë e shtojmë pak nga pak, tek supa duke e trazuar njëkohësisht që në mënyrë që masa të bëhet e njëtrajtshme.
Në fund, supës i hidhet pak gjalpë i freskët i skuqur, majdanoz i grirë shumë hollë si dhe piper i zi.
