Kolegji i Gjykatës Supreme e ka refuzuar si të pathemeltë ankesën e Lidhjes Demokratike të Kosovës e paraqitur kundër vendimit të Panelit Zgjedhor për Ankesa dhe Parashtresa.
Supremja thotë se LDK-ja, si parashtruese e kësaj ankese, me pretendimet ankimore, nuk ka arritur që të vë në dyshim vendimin e ankimuar të PZAP-së, i cili, bazuar në aktgjykim është i drejtë dhe i ligjshëm, andaj, kjo Gjykatë, ankesën e paraqitur nga Subjekti Politik Lidhja Demokratike e Kosovës, kundër vendimit të kontestuar, e refuzoi si të pathemeltë.
Paneli Zgjedhor për Ankesa e Parashtresa e kishte gjobitur me 5 mijë e 100 euro, kandidatin e Lidhjes Demokratike të Kosovës për kryetar të Komunës së Prishtinës, Përparim Rama, pasi gjyqtarët e këtij paneli vendosën ta shpallin të pranuar ankesën e Lëvizjes Vetëvendosje të parashtruar kundër LDK-së për shkak të shkeljes së Kodit të Mirësjelljes për Subjektet Politike, Mbështetësit e tyre e Kandidatët, gjatë fushatës për zgjedhjet e 12 tetorit.
Në ankesën e deponuar në PZAP nga Vetëvendosja, thuhet se Rama në mbledhjen e jashtëzakonshme të Kuvendit Komunal më 24 shtator, ku pikë e rendit të ditës ishte votimi i Projektbuxhetit për vitin 2026 ka shfrytëzuar foltoren e Kuvendit Komunal për të bërë fushatë për vete dhe për subjektin që përfaqëson.
“Ftoj qytetarët e kryeqytetit të reflektojnë, që me 12 tetor të ua tregojmë vendimin secilit asamblist që e ka bllokuar dhe vazhdon ta bllokoj këtë proces demokratik të zhvillimit dhe transformimit të kryeqytetit me votën e tyre, prandaj me 12 tetor urojmë ta kemi një shumicë me të cilën do ta vazhdojmë transformimin e qytetit ashtu siç kemi bërë këto 4 vite. Ju uroj ditë të mirë sot dhe fitore me 12 tetor”, është deklarata e Ramës, mbi të cilën është ankuar Vetëvendosje, e që sipas tyre, ai ka shfrytëzuar resurset shtetërore të nivelit lokal për qëllimin e fitimit të votave.
PZAP-ja, ka konstatuar se Rama, me këto veprime ka shkelur dispozitën e nenit 36 të Ligjit për Zgjedhjet e Përgjithshme, pasi ka shfrytëzuar hapësirat e brendshme të komunës së Prishtinës, respektivisht foltoren e Kuvendit Komunal me qëllim të përfitimit të votave.
Prandaj, Gjykata Supreme thotë se, duke u nisur nga kjo gjendje e çështjes, i pranon si të themelta konstatimet faktike dhe qëndrimin juridik të PZAP-së.
