Brenda programit të Shtëpisë së Bardhë për zbulimin e sekreteve të Amerikës” – është titulli i artikullit të fundit të revistës Time, e që në kopertinë në numrin e muajit mars, do t’i ketë tre prej zyrtarëve më të lartë amerikanë. Artikulli nis me Kosovën dhe marrëdhëniet e saj me Serbinë, e madje zbulon edhe disa informacione të reja për tensionet e muajit shtator të vitit 2024.
Ishte pasditja e 27 shtatorit, kur një ekspert i Ballkanit në Shtëpinë e Bardhë do të merrte një telefonatë shqetësuese nga një agjenci e intelegjencës amerikane, shkruhet qysh në fillim.
Forcat serbe po grumbulloheshin përgjatë vijës kufitare me Kosovën, ku NATO-ja ka mbajtur “një paqe të pakëndshme” prej luftës së vitit 1999.
Tri ditë më parë, një grup serbësh të armatosur kishin vrarë një polic kosovar në një sulm, Afrim Bunjakun. Tani Serbia po vendoste armatim të rëndë e trupa përgjatë kufirit.
“Ne ishim shumë të shqetësuar se Serbia ishte duke e përgatitur nisjen e një pushtimi ushtarak” – ka thënë një zyrtar i Këshillit të Sigurisë Kombëtare.
Por, siç shkruan “Time” tutje, pyetja ishte: çfarë të bëhet rreth kësaj? Tensionet për muaj me radhë në rritje në një cep të largët të Evropës Juglindore nuk kishin marrë shumë vëmendje në media.
“Përpjekjet diplomatike të Britanisë së Madhe, Italisë dhe vendeve të tjera me trupa në terren në Kosovë nuk kishin arritur ta qetësonin situatën. Në Uashington, vëmendja u përqendrua te kaosi në Kongres; në pjesën më të madhe të Evropës, prioriteti kryesor ishte ndarja e mbështetjes së vazhdueshme për Ukrainën. Kështu, si pjesë e një përpjekjeje për t’i bërë presion Serbisë që të tërhiqek,këshilltari i Sigurisë Kombëtare i ShBA-së, Jake Sullivan, miratoi një kërkesë nga ekipi i tij në Evropë për t’i deklasifikuar elementet e grumbullimit serb për publikim” – tregohet në këtë artikull.
Si rrodhi ngjarja tutje? “Times” tregon:
“Drejtoria e Inteligjencës NSC i redaktoi detajet sekrete të grumbullimit për t’i “errësuar” burimet dhe metodat pas inteligjencës. Më pas e dërgoi kërkesën në zyrën e drejtorit të Inteligjencës Kombëtare (ODNI) në Virxhinian Veriore përmes e-mailit të klasifikuar”.
Më 29 shtator, John Kirby nga Këshilli për Siguri Kombëtare pati një telefonatë me zyrtarë të mediave në Shtëpinë e Bardhë. Aty, ai i dha informacionet se dislokimi serb përfshinte artileri të avancuar, tanke e njësi të këmbësorisë.
“Më 29 shtator, pas një përleshjeje dyditore për ta pastruar deklasifikimin, zëdhënësi i Këshillit për Siguri Kombëtare, John Kirby pati një telefonatë të paplanifikuar në Zoom me anëtarët e trupit të mediave të Shtëpisë së Bardhë. Kirby dha informacione të reja për sulmin e 24 shtatorit ndaj oficerit të policisë kosovare dhe e dha lajmin për dislokimin e fundit serb, duke zbuluar se ai përfshinte artileri të avancuar, tanke dhe njësi të mekanizuara të këmbësorisë. Ndërsa mbulimi u rrit, vendet evropiane iu bashkuan ShBA-së në ushtrimin e presionit të ri diplomatik ndaj serbëve dhe Britania e Madhe njoftoi një dislokim shtesë të trupave në Kosovë. Brenda pak ditësh, trupat serbe po tërhiqeshin” – thuhet tutje.
Kjo, siç shkruhet tutje, është një shembull i qasjes së re së Shtëpisë së Bardhë për përdorimin e intelegjencës, e që është në rritje prej agresionit rus në Ukrianë.
Agjentët amerikanë ishin të bindur nga vjeshta e vitit 2021 se Rusia po përgatitej për një pushtim. Atë kohë, Sullivani punoi me drejtoreshën e Intelegjencës Kombëtare, Avril Haines, e drejtorin e CIA-s, William Burns, për detajet e klasifikuara të lëvizjes së Moskës.
