Derisa Partia Demokratike e Kosovës vazhdimisht po shprehet e rezervuar ndaj propozimit evropian, deputeti i kësaj partie, Xhavit Haliti, ka thënë se për interesa të vendit është mirë që ky propozimi të nënshkruhet nga pala kosovare.
Haliti shpreson që PDK të reflektojë dhe të jetë opozitë e vërtetë, pasi që sipas tij çështja e marrëveshjes nuk është vetëm e kryeministrit të vendit, por është çështje e Kosovës.
“Për interesa të vendit është mirë që të nënshkruhet marrëveshja nga pala kosovare. Unë uroj që gjatë këtyre ditëve PDK të reflektojë duke qenë opozitë e vërtetë kundër atyre që duhet me qenë, por kjo nuk është çështje e Albin Kurtit, kjo është çështje e Kosovës”, ka thënë Haliti në emisionin “Këndi i Debatit” në Tëvë1.
Ai ka thënë se marrëveshjen për normalizimin e marrëdhënieve midis Kosovës dhe Serbisë e sheh si marrëveshje që ka qenë edhe më herët.
“Mendoj që ne duhet të flasim për të metat e kësaj marrëveshje ‘nëse ka’, sepse çdokush nga këndvështrimi i vetë mundët me dhënë vërejtje të veta. Por, unë e shoh këtë marrëveshje si aneks të marrëveshjeve të mëhershme, e cila ia mundëson të dyja palëve dhe i obligon që marrëveshjet e mëparshme t’i zbatojnë përmes një dokumenti shtesë duke i pasur parasysh të gjitha ato që kanë ndodhur”, ka deklaruar Haliti.
Të shtunën, më 18 mars, në Ohër të Maqedonisë së Veriut pritet të takohen kryeministri i Kosovës, Albin Kurti dhe presidenti i Serbisë, Aleksandar Vuçiq për të biseduar për propozimin evropian.
