Francezi Theo Hernández shënoi këtë të martë kundër Como-s (1-2) golin e tij të tridhjetë në Serinë A me fanellën e Milanit, duke u bërë kështu mbrojtësi më golashënues në historinë e kuqezinjve dhe duke kaluar rekordin prej 29 golash të legjendës Paolo Maldini.
Theo Hernández theu barrierën e 30 golave në kampionatin italian dhe e bëri këtë me një gol vendimtar për të mposhtur Como-n, ekip i drejtuar nga Cesc Fàbregas, qëë kishte kaluar në avantazh me golin e spanjollit tjetër, Assane Diao.
Mbrojtësi i majtë realizoi golin e barazimit në minutën e 71-të me pak fat, pasi gjuajtja e tij e pasaktë përfundoi duke kaluar papritur portierin e ekipit të Como-s. Portugezi Rafael Leão vulosi përmbysjen pak minuta më vonë, në minutën e 76-të.
Theo, 27 vjeç, me kontratë deri në fund të sezonit 2026, dhe që herë pas here mban shiritin e kapitenit të ekipit, më 6 janar të këtij viti ngriti trofeun e tij të dytë me Milanin, Superkupën e Italisë, pas fitores ndaj Interit në finale (2-3). Gjithashtu, ai fitoi Scudetto-n në vitin 2022.
Gjatë këtij sezoni, francezi pati probleme me portugezin Paulo Fonseca, ish-trajnerin e ekipit, i cili e ndëshkoi dhe e kritikoi publikisht disa herë për rënien në formë. Që nga ardhja e portugezit tjetër, Sérgio Conceição, ai ka luajtur 90 minuta të plota në 4 ndeshjet e fundit.
“Jam vërtet i lumtur, të bëj histori në një klub që më ka mirëpritur kaq mirë është diçka e veçantë. Pastaj, ta parakaloj idhullin tim, Paolo, është e pabesueshme, por tani duhet të vazhdojmë kështu. Gjithsesi, ajo që duhet të ndryshojmë është mënyra se si e nisim ndeshjen. E fillojmë shumë ngadalë dhe kjo nuk është mirë. Pastaj, në pjesën e dytë, shtuam intensitetin dhe arritëm të fitonim. Renditja nuk është aspak e këndshme, ne jemi Milani dhe duhet të kryesojmë. Kaluam një periudhë të vështirë, por tani, me fitoren në Superkupë dhe atë të sotmen, shpresojmë të rikthehemi në zonën e Champions League”, deklaroi francezi pas ndeshjes me Como-n.s.n.
