Skuadrat e Trepçës dhe Borës kanë siguruar kualifikimin në gjysmëfinale të Kupës së Kosovës në basketboll, pas fitoreve të arritura të mërkurën mbrëma.
Trepça ka kaluar tutje me përmbysje, pasi ka mposhtur Golden Eagle Yllin në Suharekë me rezultat 88:76, duke kompensuar humbjen e ndeshjes së parë në Mitrovicë (99:102).
Ndeshja ka qenë e fortë dhe e luftuar, sidomos në pjesën e parë, ndërsa mitrovicasit e kanë vendosur takimin në pjesën e dytë, kur kanë dominuar në çerekun e tretë dhe e kanë menaxhuar epërsinë deri në fund.
Çereku i parë ka përfunduar 21:19 për Trepçën, ndërsa pas njëzet minutave rezultati ka qenë i ngushtë. Pas tridhjetë minutave, Trepça ka kryesuar 68:56, për ta mbyllur ndeshjen me dymbëdhjetë pikë dallim.
Më i dalluari te kampionët në fuqi ka qenë Akili Vining me pesëmbëdhjetë pikë, shtatë kërcime dhe gjashtë asistime. Mustapha Amzil ka shënuar tetëmbëdhjetë pikë, ndërsa Kenneth Hasbrouck ka kontribuar me shtatëmbëdhjetë pikë. Te Ylli janë veçuar Scott Bamforth me njëzet e gjashtë pikë dhe Brandon Huffman me njëzet pikë e katërmbëdhjetë kërcime.
Në ndeshjen tjetër çerekfinale, Bora e Prishtinës e ka konfirmuar kualifikimin, duke mposhtur Rahovecin 029 në udhëtim me rezultat 71:62, pas fitores edhe në ndeshjen e parë.
Shaquan Jules ka qenë më i miri te Bora me njëzet e dy pikë dhe shtatë kërcime, ndërsa te vendasit është dalluar Kentrell Pullian me njëzet e dy pikë, shtatë kërcime dhe pesë asistime.
Dy çerekfinalet e tjera të Kupës së Kosovës, Peja – Bashkimi dhe Prishtina – Vëllaznimi, do të zhvillohen të enjten mbrëma.
