Presidenti serb Aleksandar Vuçiç është futur në panik politik dhe ushtarak, menjëherë pas ndërhyrjes së SHBA në Venezuelë, ku regjimi i Maduros u godit nga Uashingtoni si organizatë terroriste me lidhje me trafik ndërkombëtar droge. Në një mbledhje të jashtëzakonshme të Këshillit për Siguri Kombëtare, Vuçiç paralajmëroi se “po shembet rendi i vjetër botëror” dhe se “në këtë botë funksionon vetëm e drejta e më të fortit”.
“Sot nuk vlejnë më rregullat ndërkombëtare. Duhet ta pranojmë se Karta e OKB-së nuk funksionon më. Pas aksionit të SHBA në Venezuelë, bota drejtohet vetëm nga parimi i forcës – kush është më i fortë, shtyp më të dobëtin”, deklaroi Vuçiç.
Ai vuri në dukje se reagimi i përfaqësuesve të BE-së ndaj zhvillimeve në Venezuelë ishte i vakët, duke shtuar se ata ndjekin interesat e tyre të vogla dhe “kanë frikë se çfarë do të ndodhë me Grenlandën”.
Presidenti serb theksoi gjithashtu se Serbia është e shqetësuar për furnizimin me armë të institucioneve të sigurisë në Kosovë, gjë që sipas tij ndodh në kundërshtim me Kartën e OKB-së. “Po ndodh një përshpejtim i dukshëm i armatosjes së Prishtinës, veçanërisht me mbështetjen e Turqisë”, tha Vuçiç.
Ai shtoi se “Prishtina, Tirana dhe Zagrebi po punojnë në një sistem të ndërlikuar ushtarak”, dhe se Serbia është e shqetësuar për këtë zhvillim. “Ne po përgatitemi për mbrojtje nga ata që po na kërcënojnë hapur,” u shpreh ai.
Në mbledhje, sipas tij, u diskutua edhe mënyra se si Serbia do të vazhdojë procesin e modernizimit dhe armatosjes së ushtrisë. “Do të ketë investime të reja në industrinë ushtarake, si dhe në rezervat e ushqimit, ujit dhe municionit. Furnizimet me karburant për ushtrinë janë të mjaftueshme”, theksoi Vuçiç.
Ai deklaroi se brenda 18 muajve të ardhshëm, kapacitetet ushtarake të Serbisë do të dyfishohen, ndërsa kapacitetet njerëzore do të rriten me një të tretën. “Duhet të mbështetemi vetëm te vetja jonë. Edhe nëse dikush nga rajoni na sulmon, askush nuk do të na ndihmojë. Askush nga fuqitë e mëdha nuk do të na sulmojë, por duhet të jemi gati për çdo skenar”, tha ai.
Vuçiç theksoi gjithashtu se Serbia nuk kërkon konflikt dhe ruan paqen, por ka kapacitete të mjaftueshme për të penguar çdo sulm të mundshëm. “Nuk ka kërcënim të drejtpërdrejtë për momentin, por forca jonë është më e madhe se e çdo agresori potencial”, shtoi ai.
Në fund, ai u ndal edhe te siguria energjetike, duke përmendur se bota po kalon në një fazë të re për sa i përket kontrollit të burimeve energjetike. “Presidenti Trump ka themeluar një Agjenci për dominimin amerikan në fushën energjetike që funksionon pranë Shtëpisë së Bardhë. Ata po bëjnë gjithçka që të largojnë konkurrencën, sidomos Rusinë dhe Kinën”, deklaroi presidenti i Serbisë.
