Presidenti amerikan Donald Trump kritikoi të premten aleatët e NATO-s për mungesën e mbështetjes në luftën SHBA-Izrael kundër Iranit, duke i quajtur ata “frikacakë” dhe duke kërkuar angazhim për sigurinë e lundrimit në Ngushticën e Hormuzit. “Pa SHBA-në, NATO ËSHTË NJË TIGËR PREJ LETRE!” shkroi Trump në një postim në rrjetet sociale.
Trump ka kërkuar që aleatët kryesorë të SHBA-së dhe vende të tjera – asnjëra prej të cilave nuk ishte konsultuar apo njoftuar për luftën – të ndihmojnë në garantimin e sigurisë së lundrimit përmes Ngushticës së Hormuzit, e kontrolluar nga Irani.
Konflikti ka tronditur tregjet globale, ka shkaktuar mijëra viktima dhe ka zhvendosur miliona njerëz që nga nisja e sulmeve SHBA-Izrael më 28 shkurt.
Presidenti amerikan u ankua se vendet e NATO-s nuk duan t’i bashkohen luftës kundër Iranit, por megjithatë ankohen për çmimet e larta të naftës.
“Tani që kjo luftë është FITUAR ushtarakisht, me shumë pak rrezik për ta, ata ankohen për çmimet e larta të naftës që detyrohen të paguajnë, por nuk duan të ndihmojnë për hapjen e Ngushticës së Hormuzit, një manovër e thjeshtë ushtarake që është arsyeja kryesore për çmimet e larta të naftës. Është kaq e lehtë për ta, me kaq pak rrezik,” shkroi ai.
“FRAKACAKË, dhe ne do ta MBAJMË MEND!” shtoi Trump.
Gjermania, Britania, Franca, Italia, Holanda, Japonia dhe Kanadaja u zotuan në një deklaratë të përbashkët të enjten se do t’u bashkohen “përpjekjeve të përshtatshme për të garantuar kalim të sigurt përmes Ngushticës së Hormuzit”.
Megjithatë, kancelari gjerman Friedrich Merz e bëri të qartë se kjo nënkupton paraprakisht përfundimin e luftimeve.
Presidenti francez Emmanuel Macron tha pas samitit të Bashkimit Evropian në Bruksel se mbrojtja e ligjit ndërkombëtar dhe nxitja e de-përshkallëzimit ishte “gjëja më e mirë që mund të bëjmë”.
“Nuk kam dëgjuar askënd këtu të shprehë gatishmëri për të hyrë në këtë konflikt – përkundrazi,” tha Macron./Reuters
