Turqia dhe Arabia Saudite nënshkruan sot një marrëveshje investimi në fushën e energjisë me vlerë rreth 2 miliardë dollarë, që përfshin projekte të energjisë së erës dhe asaj diellore në Turqi, njoftoi ministri turk i Energjisë, Alparslan Bayraktar, transmeton Anadolu.
“Në Riad, kryeqytetin e Arabisë Saudite, nënshkruam Marrëveshjen Ndërqeveritare ndërmjet Qeverisë së Republikës së Turqisë dhe Qeverisë së Mbretërisë së Arabisë Saudite për projekte të centraleve të energjisë së rinovueshme, së bashku me homologun tim saudit, Shkëlqesinë e Tij Abdulaziz bin Salman Al Saud”, shkroi Bayraktar në platformën sociale turke NSosyal.
Sipas Bayraktar, dy vendet synojnë që kompanitë saudite të ndërtojnë në Turqi centrale diellore dhe të erës me kapacitet të përgjithshëm prej 5.000 megavatësh.
Si fazë e parë e investimit, do të realizohen projekte të centraleve diellore me kapacitet total prej 2.000 megavatësh në provincat turke Sivas dhe Karaman.
“Këto investime, të cilat do të jenë ndër shembujt më të rëndësishëm të investimeve të huaja direkte në sektorin tonë energjetik, i shohim si të financuara plotësisht përmes burimeve të jashtme. Kredite do të sigurohen gjithashtu nga institucionet financiare ndërkombëtare”, theksoi ai.
Ai shtoi se centralet diellore, që do të ndërtohen me një investim prej rreth 2 miliardë dollarësh, do të plotësojnë nevojat për energji elektrike të rreth 2,1 milionë familjeve.
“Këto projekte, që dëshmojnë besimin në klimën e investimeve dhe sektorin energjetik të Turqisë, përbëjnë një nga hapat më të rëndësishëm drejt objektivit të vendosur nga presidenti ynë i nderuar për të arritur një kapacitet të instaluar prej 120.000 megavatësh në energjinë diellore dhe të erës deri në vitin 2035”, shtoi Bayraktar.
Bayraktar ishte pjesë e delegacionit të presidentit turk Recep Tayyip Erdogan, i cili vizitoi Riadin të martën.
