Patriarku ortodoks grek Theofilos III dhe kardinali Pierbattista Pizzaballa udhëtuan për në Gaza sot për të vizituar Kishën Katolike të Familjes së Shenjtë, e cila dje u sulmua nga ushtria izraelite.
Sipas një deklarate të përbashkët nga kishat në Kuds, vizita vjen në përgjigje të një sulmi izraelit me tank izraelit që goditi kompleksin e kishës të enjten.
Pasi vizitoi Kishën Katolike të Familjes së Shenjtë, famullinë e vetme katolike në Gaza, së bashku me patriarkun ortodoks grek Theofilos III, kardinali Pierbattista Pizzaballa tha se papa e ka telefonuar personalisht gjatë vizitës për të shprehur shqetësimin e tij.
“Papa Leoni deklaroi vazhdimisht se është koha për të ndaluar këtë masakër, se ajo që ka ndodhur është e pajustifikueshme dhe se duhet të sigurohemi që të mos ketë më viktima”, tha Pizzaballa për “Vatican News”.
Papa përcolli “afërsinë, kujdesin, lutjen, mbështetjen dhe dëshirën e tij për të bërë gjithçka që është e mundur për të arritur jo vetëm një armëpushim, por edhe një fund të kësaj tragjedie”, shtoi ai.
Vizita erdhi një ditë pasi një predhë tanku izraelit goditi famullinë, duke vrarë tre persona dhe duke plagosur dhjetë të tjerë, përfshirë priftin e famullisë, Atë Gabriel Romanelli.
Kisha e Familjes së Shenjtë kishte strehuar rreth 600 civilë, përfshirë fëmijë me nevoja të veçanta.
Pizzaballa falënderoi papën për “solidaritetin e tij dhe lutjet për të cilat na kishte siguruar tashmë”, duke thënë se i gjithë komuniteti katolik në Gaza është mirënjohës.
Ai tha se delegacioni kishtar dorëzoi qindra tonë ndihma humanitare, përfshirë ushqim dhe furnizime mjekësore, dhe ndihmoi në evakuimin e të plagosurve për trajtim jashtë Gazës.
Në një deklaratë tjetër të përbashkët, patriarkët dhe krerët e kishave në Kuds e dënuan sulmin.
“Në unitet të palëkundur, ne e denoncojmë fuqimisht këtë krim”, thanë ata.
“Shtëpitë e adhurimit janë hapësira të shenjta që duhet të mbahen të sigurta. Ato mbrohen gjithashtu sipas ligjit ndërkombëtar. Synimi i një kishe që strehon afërsisht 600 refugjatë, përfshirë fëmijë me nevoja të veçanta, është shkelje e këtyre ligjeve. Është gjithashtu fyerje ndaj dinjitetit njerëzor, shkelje e shenjtërisë së jetës njerëzore dhe përdhosje e një vendi të shenjtë”, thuhet në deklaratë.
Ata i bënë thirrje bashkësisë ndërkombëtare të kërkojë një armëpushim të menjëhershëm, të sigurojë mbrojtjen e të gjitha vendeve fetare dhe humanitare dhe të ofrojë ndihmë urgjente për civilët në gjithë Gazën./trt
