Inteligjenca ukrainase ka sulmuar urën e Kerçit në Krime, një copëz e infrastrukturës ruse e ndërtuar ilegalisht pas aneksimit të njëanshëm të gadishullit ukrainas në 2014-n.
Shërbimet e sigurisë në Kiev publikuan një video të sulmit, që tregon shpërthimet nënujore. Operacioni, që kërkoi muaj të tërë për t’u planifikuar, u krye nga Shërbimi Ukrainas i Sigurisë, SBU.
Në një deklaratë zyrtare në rrjetin “Telegram”, agjencia e spiunazhit sqaroi se si kishte arritur të godiste urën ruse për herë të tretë që nga fillimi i pushtimit në shkurt të 2022-shit.
“Operacioni zgjati disa muaj. Agjentët e SBU-së minuan themelet mbajtëse të kësaj strukture të paligjshme pa shkaktuar dëme në njerëz”, thuhet në komunikatë.
Në dokumentin në fjalë saktësohet se shpërthimi i parë u realizua në orën 4 e 44 të mëngjesit.
Agjencia shtoi se themelet nënujore të urës u dëmtuan rëndë pasi në tërësi u përdorën 1 mijë e 100 kilogramë eksploziv i llojit tritol.
Ura e Kerçit lidh Rusinë me gadishullin ukrainas dhe përbën një aks të rëndësishëm transporti dhe furnizimesh për trupat ruse që ndodhen në territoret e pushtuara në jug të Ukrainës.
Kievi e ka vënë në shënjestër atë dy herë në të kaluarën, njëherë në tetor të vitit 2022 dhe herën tjetër në korrik të vitit pasardhës, duke e dëmtuar, por jo duke e shkatërruar.
Operacioni në fjalë pason atë masiv me dronë ndaj objektivave strategjikë të aviacionit rus, i mbikëqyrur personalisht nga shefi i SBU-së, Vasyl Maliuk.
