Inas Hamdan, nga Zyra e Mediave në Gaza e Agjencisë së Kombeve të Bashkuara për Ndihmë për Refugjatët Palestinezë në Lindjen e Mesme (UNRWA), deklaroi se Izraeli ka refuzuar kërkesën e tyre për të hequr trupat që ndodhen nën rrënojat në veri të Gazës, transmeton Kosova Post.
Hamdan i tha agjencisë Anadolu se situata humanitare në veri të Gazës është përkeqësuar më tej për shkak të sulmeve izraelite.
“Gjatë dy javëve të fundit kemi paralajmëruar për ashpërsimin e bllokadës në veri të Gazës dhe në kampin e refugjatëve Jabalia. Situata po bëhet edhe më e frikshme. Sulmet ushtarake të Izraelit në veri të Gazës kanë vënë dhjetëra mijëra civilë në rrezik të madh,” tha ajo.
Ajo shtoi se sulmet izraelite në veri të Gazës po i pengojnë njerëzit të kenë qasje në nevojat bazë për të mbijetuar, përfshirë ujin.
Ajo theksoi se kanë marrë informacion se palestinezët në kampin e refugjatëve Jabalia po mbeten pa ujë dhe ushqim.
Ajo kujtoi se më 18 tetor Izraeli sulmoi Spitalin Indonezian dhe Spitalin Al-Awda, dy nga tri spitalet në veri të Gazës.
“Sulmet ndaj spitaleve përkeqësojnë më tej situatën humanitare në Gaza,” tha Hamdan.
