Ushtarët në vijën e frontit në Ukrainë kanë reaguar ndaj propozimeve të draftit amerikan për paqe me një ndjenjë të përzier.
BBC foli me gjashtë prej tyre, të cilët dërguan mendimet e tyre përmes rrjeteve sociale dhe emailit, në përgjigje të planit fillestar amerikan, detajet e të cilit u publikuan javën e kaluar.
Që atëherë, negociatorët amerikanë dhe ukrainas po punojnë për ndryshime në propozime dhe pritet të vazhdojnë bisedimet rreth “kuadrit të paqes”.
Lidhur me planin fillestar amerikan, një ushtarak me emrin Yaroslav nga Ukraina lindore thotë se ai “është i tmerrshëm… askush nuk do ta mbështesë”, ndërsa një mjek ushtarak me nofkën Shtutser e hodhi poshtë atë si një “draft absolutisht i turpshëm i një plani paqeje, i pavlerë për vëmendjen tonë”.
Por një tjetër ushtar me nofkën Gjarpri i tha BBC-së se “është koha të biem dakord të paktën për diçka”.
Këto janë mendimet e ushtarëve që folën për BBC-në lidhur me disa prej pikave kyçe në draftin fillestar të planit amerikan të paqes.
