Ushtria ukrainase po vazhdon përparimin brenda territorit rus dhe po I përforcon pozicionet e saja, ka thënë presidenti ukrainas Volodimir Zelenski ndërsa rusia ka thënë se ka zmbrapsur ushtrinë ukrainase në tre vendbanime në rajonin e Kurskut.
Trupat ushtarake ukrainase po i përforcojnë pozicionet në territorin e marrë nën kontroll në Rusi dhe po zgjerohen edhe më tej, ka thënë presidenti ukrainas Volodymyr Zelenski.
Në një deklaratë në Telegram presidenti ukrainas i ka falënderuar gjithë ushtarët dhe komandantët të cilët po marrin robër ushtarë rus dhe po sjellin më afër lirimin e ushtarëve dhe qytetarëve që po mbahen nga Rusia, ka shkruar Zelenski.
Kievi po pretendon se ka marrë kontrollin e më shumë se 80 vendbanimeve në territorin rus gjatë kësaj ndërhyrjeje të shpejtë.
Ndërsa Rusia ka deklaruar se forcat e saja kanë zmbrapsur forcat ushtarake ukrainase në afërsi të tre vendbanimeve në rajonin e Kurskut dhe se janë në kërkim të, siç kanë thënë, grupeve lëvizëse të armikut që po përpiqen të depërtojnë më thellë brenda vendit.
Sipas autoriteteve ukrainase, të shtunën Rusia ka ndërmarrë sulme të paktën në katër rajone përfshirë edhe rajonin veri-lindor të Kievit.
