Sikur të mos mjaftonte eliminimi nga Champions League, i dhimbshëm si çdo eliminim që vjen pas gjuajtjeve të penalltive, në rrjetet sociale kanë qarkulluar në orët pas ndeshjes disa imazhe që po i shqetësojnë tifozët.
Në tunelin që çon drejt dhomave të zhveshjes, Virgil Van Dijk shihet duke biseduar me presidentin e Paris Saint-Germain, Nasser Al-Khelaifi, dhe me këshilltarin strategjik të klubit, Luis Campos. I veshur me tuta sportive dhe me shapka, mbrojtësi holandez ka zhvilluar atë që RMC Sport në Francë e përshkruan si një “bisedë të gjatë”, e cila është kapur nga kamerat e FootMercato.
Është e vështirë të interpretosh se çfarë është diskutuar mes tyre, por fakti që kontrata e Van Dijk skadon më 30 qershor dhe ende nuk ka pasur ndonjë rinovim, ka alarmuar tifozët e Liverpool-it.
Vetëm dy javë më parë, Van Dijk kishte deklaruar për Sky Sport:
“Në muajt e ardhshëm do të ketë përditësime për të ardhmen time. Kur të ketë një përgjigje përfundimtare, ajo ndoshta do të bëhet publike… Gjithmonë kam thënë se jam mjaft i qetë në lidhje me këtë çështje.”s.n.
