Shërbimi Korrektues i Kosovës bën të ditur se të hënën në Klinikën Infektive në QKUK ka vdekur një i burgosur me inicialet A.M.
Nga Shërbimi Korrektues , thuhet se i njëjti ishte pranuar në Qendrën e Paraburgimit në Prishtinë më 14 nëntor 2024.
“Në momentin e pranimit, gjendja e tij ka qenë stabile, por me të dhëna për sëmundje paraprake të mushkërive. Ai ishte duke u trajtuar për një gjendje gripale, e cila ka progreduar në mushkëri. Për këtë arsye, është dërguar për kontroll specialistike pulmologjike. Në Klinikën e Emergjencës në SHSKUK, janë konsultuar radiologu, pulmologu dhe kirurgu torakal, dhe pacienti është transferuar në Klinikën Infektive. Gjendja e tij ka filluar të përkeqësohet dhe, përkundër angazhimit të stafit të kësaj klinike, nuk është arritur që pacienti të mbahet në jetë”, thuhet në njoftim e SHKK-së.
Ndërkohë bëhet e ditur nga SHKK se organet kompetente janë duke zhvilluar procedurat ligjore, ndërkaq autopsia do të verifikojë shkakun e vdekjes.
