VLEN ka dalur sot me një komunikatë të radhës ku theksohet se pas pastrimit të hapësirave publike si pjesë e javës evropian do të vijoj pastrimi i skenës politike.
“Fundjava e Pastrimit” është më shumë se një aksion simbolik, pasi paraqet një reflektim të vlerave evropiane në praktikë. Përgjegjësi qytetare, angazhim kolektiv dhe përkushtim për një të ardhme me mjedis më të pastër. Në këtë nismë të dobishme, morën pjesë edhe përfaqësues të lartë shtetërorë, përfshirë zëvendëskryeministrin Izet Mexhiti dhe drejtues të tjerë të subjektit VLEN.
Por ky aksion nuk është fundi është vetëm fillimi. Sepse ky vit nuk është vetëm për pastrimin e hapësirave publike, por për pastrimin e skenës politike! Ne po hyjmë në vitin e pastrimit të madh ku qytetarët do të kenë mundësinë të largojnë mbeturinat politike që kanë bllokuar zhvillimin e vendit për vite me radhë. Fosilet e BDI-së, që kanë ngelur në pushtetin lokal pa asnjë vizion, do të dërgohen atje ku e kanë vendin, në histori, tek bashkëpartiakët e tyre në opozitë që të reformohen apo reciklohen.
VLEN do të jetë zëri i ndryshimit në çdo komunë shqiptare. Ne ofrojmë alternativa konkrete të mirëqeverisjes si në pushtetin qendror ngjashëm edhe në atë lokal. Nuk kërkojmë thjesht pushtet, kërkojmë pastrim të thellë, të vërtetë dhe të qëndrueshëm.
Ftojmë të gjithë qytetarët që të bashkohen me këtë energji të re. Nga rrugët e pastra, në institucione lokale të pastra. Nga fundjava e pastrimit, drejt një viti të pastrimit politik. Koha e fosileve mbaroi, koha e VLEN sapo ka nisur!”, thekson VLEN.
