Një ditë pas vrasjes së blogerit që përkrahte sulmin e Rusisë ndaj Ukrainës Vladlen Tatarsky hetuesit kanë arrestuar një grua që dyshohet se ka qenë shkaku i shpërthimit.
Ajo ishte shpallur në kërkim pas identifikimit nga kamerat e sigurisë.
Mediat e Moskës raportuan se Tatarsky po takohej me të pranishmit kur një grua i dhuroi atij një kuti që mbante një bust të vogël, që me sa duket shpërtheu më pas.
Sipas akuzave të bëra publike nga mediat e Moskës gruaja është afruar tek blogeri si fanse e tij, duke i dhënë dhuratën, brenda të cilës kishte lëndë shpërthyese.
Ministria e Brendshme ruse e identifikoi si Darya Tryopova, 26-vjeçare, banore në Shën Petersburg, e cila ishte arrestuar më parë për pjesëmarrje në protestat kundër luftës.
Fillimisht autoritetet kanë thënë se atentati po hetohej si një “vrasje e profilit të lartë”. Videot e postuara në rrjetet sociale treguan një shpërthim dhe njerëz të plagosur në rrugë.
Këshilltari presidencial ukrainas Mykhail Podolyak në një postim në rrjetet sociale, fajësoi për shpërthimin një “luftë të brendshme politike” ruse: “Merimangat po hanë njëra-tjetrën në një kavanoz”.
