Aleksandër Vuçiq nuk po fshihet më. Presidenti i Serbisë konfirmon se po armatoset sepse vendi i tij është i rrethuar nga NATO. Ai vazhdon mesazhet e koduara për sigurinë në Ballkanin Perëndimor edhe pas një takimi që zhvilloi me Sheikun Mohammed bin Zayed në Abu Dabi.
Vuçiq shfrytëzoi vizitën në Emiratet e Bashkuara Arabe për të folur për krizën në Lindjen e Mesme ku kërkoi paqe për të mos rritur çmimin e naftës, jo për ndonjë arsye tjetër.
“Shpresoj që diçka të ndodhë në 48 orët e ardhshme dhe se do të arrijmë të ruajmë stabilitetin edhe në vendin tonë”, ka thënë Vuçiq.
Vuçiqi kërkoi ndihmë nga Emiratet e Bashkuara Arabe, veçanërisht me teknologji ushtarake, pasi siç tha ai, “është jashtëzakonisht e rëndësishme që t’i tregojë muskujt vendeve fqinje sepse Serbia rrethohet nga NATO”.
“Ne duhet ta forcojmë ushtrinë tonë për të ruajtur paqen, stabilitetin, sovranitetin dhe pavarësinë tonë. Sigurisht, duke mos rrezikuar askënd, por për të penguar këdo që do të mendonte se Serbia mund të jetë pre e lehtë në botën e sotme, një botë me paqëndrueshmëri të madhe, dhe do të thoja, me një të nesërme të panjohur”, tha presidenti serb.
Vuçiqi njoftoi se Serbia do të mbajë një paradë të madhe ushtarake në Beograd në mesin e shtatorit.
“Kjo do të jetë diçka që njerëzit në rajon nuk kanë mundur ta shohin deri më tani. Ne do të tregojmë shumë gjëra që shumica e qytetarëve serbë nuk i dinë, të cilat ndërkohë i kemi fituar, prodhuar ose arritur t’i fusim, siç thonë ekspertët, në armatimin e Ushtrisë Serbe”, ka shtuar ai.
Sipas mediave serbe, Vuçiqi i ka folur Sheikut të Emirateve të Bashkuara Arabe dhe për Kosovën duke i shprehur pretendimet e tij të pabaza për një dhunë kundër serbëve.
