Fotografia e pacientit të shtruar në spitalin e Beogradit, rreth së cilit krahas presidentit serb Aleksandar Vuçiq, shiheshin edhe dhjetëra persona të tjerë përfaqësues të mediave, shkaktoi shumë reagime në opinion.
Këtë fotografi e kishte postuar Vuçiq, pasi pacientë të vendit tonë u dërguan për mjekim të mëtejshëm në Serbi. Por, në vizitat e pacientëve të këtillë, kur protokollet duhet të jenë shumë strikte, Vuçiq shfrytëzoi rastin për të bërë PR për veten e tij, duke pasur parasysh edhe faktin se në çfarë situate të trazuar gjendet Serbia këto kohë përshkak të protestave masive kundër pushtetit.
Se sa të rrepta duhet të jenë protokollet e pacientëve që kanë pësuar djegje nga zjarri në Koçan, e thotë edhe drejtori i spitalit “8 shtatori” Sinisha Stojanoski.
Sinisha Stojanoski, drejtor i 8 shtatorit
“Unë do të përmbahesha nga komentimi i institucione të tjera. Këtu siç mund të shihni protokollet respektohen rreptësisht dhe kujdesemi maksimalisht në sterilitetin sepse djegja është plagë e hapur dhe patjetër duhet të kujdesemi që të mos vije deri tek infeksionet potenciale në plagën e pacientit”.
Edhe vizitat e kryeministrit Hristijan Mickoskit te personat e lënduar në zjarrin në Koçan në spitalet e vendit tonë nuk kanë qenë të pakëta këto dy ditë, por ai thotë se ka respektuar të gjitha protokollet.
Hristijan Mickoski, kryeministër
“Edhe dje edhe sot kam vizituar pacientë. Edhe sot edhe dje, jam kujdesur për protokollet të cilat më janë kërkuar nga doktorët. Nuk do të shihni fytyrë dhe nuk do të dëgjoni emër të ndonjë pacienti që unë e kam vizituar. Po, ka edhe të tillë që hyjnë me kamera dhe të ngjajshme, unë as nuk hyj me kamer dhe as nuk kam ndërmend të bëjë PR prej kësaj gjëje”.
Megjithatë në disa fotografi të postuara nga vetë Mickoski shihet se gjatë një vizite tek pacientët ditën e djeshme, ai dhe ministri Arben Taravari kanë pasur vetëm maskë të vendosur në fytyrë./shenja
