Lëvizja Vetvendosje sot ka parashtruar kërkesë për vlerësimin e kushtetutshmërisë së vendimit të Gjykatës Supreme për votat me postë në Gjykatë Kushtetuese teksa ka kërkuar edhe masë të përkohshme, transmeton KosovaPost.
Vendimin e Supremes, VV e ka cilësuar si “absurd dhe të ndikuar politikisht”.
“Konsiderojmë se është detyrë e të gjithëve dhe veçanërisht e inistutcioneve të thirrura që të ruajnë vullnetin e shprehur të qytetarëve në procesin zgjedhor, vullnet nga i cili buron legjitimiteti i secilit institucion të Republikës. Kësisoj, vetëm një vendim i drejtë i Gjykatës Kushtetuese do të ishte siguresë e ndalimit të deformimi të tillë.”, thuhet në njoftim.
“Në këto rrethana vendimi në kohë sa më të hershme në lidhje me kërkesën për masë të përkohshme do të ishte mundësi e vetme e parandalimit të tjetërsimit dhe deformimit të vullnetit të shprehur të qytetarëve në zgjedhjet e 9 shkurtit 2025.”, thuhet tutje.
Ndryshe, Komisioni Qendror i Zgjedhjeve (KQZ) në Kosovë ka certifikuar rezultatet e zgjedhjeve parlamentare të mbajtura më 9 shkurt.
Certifikimi u bë pasi kanë kaluar të gjitha afatet e ankesave të partive dhe kandidatëve për deputetë në Panelin për Ankesa dhe Parashtresa dhe në Gjykatën Supreme.
Sipas rezultateve përfundimtare të shpallura nga KQZ-ja më 27mars:
Lëvizja Vetëvendosje (LVV) ka fituar 42.30% të votave,
Partia Demokratike e Kosovës (PDK) me 20.95%,
Lidhja Demokratike e Kosovës (LDK) me 18.27%,
Në vendin e katërt është koalicioni mes Aleancës për Ardhmërinë e Kosovës (AAK) dhe Nismës Socialdemokrate me 7.06% të votave.
Lista Serbe – partia më e madhe e serbëve në Kosovë – ka siguruar 4.26% të votave.
Bazuar në këto përqindje, LVV-ja ka siguruar 48 ulëse në Kuvendin e Kosovës, PDK-ja 24, LDK-ja 20, Lista Serbe 9 dhe koalicioni AAK-Nisma 8 vende.
