Zohran Mamdani u betua si kryetar bashkie i qytetit të Nju Jorkut, duke hyrë në histori si myslimani i parë dhe drejtuesi më i ri i brezit të tij që merr këtë detyrë në qytetin më të madh të Shteteve të Bashkuara.
34-vjeçari bëri betimin pak pas mesnatës në një ceremoni të thjeshtë, të zhvilluar në stacionin historik të metrosë “Old City Hall”, në prani të Prokurores së Përgjithshme të shtetit të Nju Jorkut, Letitia James. Ai u shoqërua nga bashkëshortja e tij, Rama Duwaji.
Në deklaratën e tij të parë pas marrjes së detyrës, Mamdani e cilësoi rolin e ri si një nder dhe privilegj të madh, duke theksuar përgjegjësinë që vjen me drejtimin e qytetit. Ai njoftoi gjithashtu emërimin e një komisioneri të ri për Transportin.
Një ceremoni e dytë, më e madhe dhe e hapur për publikun, pritet të mbahet sonte në mbrëmje në Bashkinë e Nju Jorkut, ku betimi do të administrohet nga senatori progresist Bernie Sanders, ndërsa kongresmenja Alexandria Ocasio-Cortez do të mbajë një fjalim.
Pas ceremonisë, autoritetet kanë planifikuar një festival publik përreth ndërtesës së Bashkisë.
Mamdani siguroi fitoren në zgjedhjet e mbajtura në fillim të muajit nëntor, duke fituar një mandat katërvjeçar si kryetar bashkie.
Betimi në ndërrimin e viteve është një traditë e hershme në Nju Jork. Paraardhësi i tij, Eric Adams, u betua për herë të parë në sheshin “Times Square”.
