Kryetari i LDK-së, Lumir Abdixhiku, kujton heroin Agim Ramadani në 25 vjetorin e rënies së tij, ndërsa thekson se lufta na e mori strategun më të mirë të kohës, përcjell Kosova Post.
Ndërsa kujton heroizimin e komandant Katanës, Abdixhiku shprehet se historia e lavdishme e Kosovës ka shumë ditë që na pikëllojnë, por në të njëjtën kohë tha ai na bëjnë edhe krenar, sikur ditët e prillit kur u thye kufiri shqiptaro-shqiptar në Betejën e Koshares.
“Në historinë tonë të lavdishme; të papërsëritshme, janë disa ditë që aq sa na pikëllojnë, na bëjnë edhe më shumë krenar. Ditë të tilla janë këto të prillit, kur në majet e larta nën udhëheqjen e strategëve të luftës për liri, Agim Ramadani “Katana” dhe Sali Çekaj, u thye kufiri shqiptaro-shqiptar me Betejën e Koshares, atë më të lavdishme të Ushtrisë Çlirimtare të Kosovës”, tha Abdixhiku.
Abdixhiku tutje theksoi se Katana u kthye në motiv për të vazhduar luftën deri në çlirim.
“Në agimin e 11 prillit, në vend se t’i gëzoheshim rrugëtimit drejt çlirimit të Kosovës, lufta na e mori strategun më të mirë të kohës, luftëtarin e Heroin e Kosovës, Agim Ramadani, atje skaj bjeshkëve të ashpra ku edhe pushon përjetësisht trupi i tij. Kumti i trishtueshëm që në vijat e para të frontit në Koshare, ra Agim Ramadani; nuk i ligështoi shokët e luftës. Ata tashmë kishin motivin për të vazhduar deri në çlirim. Kosova e pavarur, ishte ëndrra e të 114 dëshmorëve të Brigadës 138 të udhëhequr nga Agim Ramadani që tashmë po shkruanin me sakrificën e tyre njërën prej rrëfimeve më të madhërishme të luftës për liri e pavarësi”, shtoi ai.
Tutje, Abdixhiku tha se sot kujtojmë piktorin dhe shkrimtarin Agim Ramadani, i cili përmes vargjeve i dha jetë, luftës e lirisë.
“Në kohët më të vështira, kur lëshoj zë kushtrimi i atdheut, Agimi, si gjithmonë ishte në krye të detyrës, ndërsa vetë ai i paepur për liri e çlirim nuk ndihej i përmbushur pa sakrificën më sublime edhe me vet jetën e tij. Në këtë përvjetor ne nderojmë përjetësisht figurën shumëdimensionale, unike e të papërsëritshme të Agim Ramadanit; nderojmë dhe kontributin e gjurmët e tij të pashlyeshme në rrugëtimin për liri e shtet-ndërtim. Lavdi e përjetshme, Heroit Agim Ramadani dhe të gjithë dëshmorëve të rënë për liri!”,u shpreh Abdixhiku.
