Partia Demokratike e Kosovës (PDK) ka pranuar ftesën e kryeministrit të Kosovës, Albin Kurti, për t’u takuar një në dark pune.
Kështu ka bërë të ditur për Tëvë1, zëdhënësi i PDK-së, Faton Abdullahu, i cili tha se kryetari i kësaj partie, Memli Krasniqi do to marrë pjesë në takim të hënën.
Abdullahu tha se pjesëmarrja e Krasniqit do të jetë në funksion të diskutimit për mundësinë e caktimit të datës për zgjedhje të reja.
“Qëndrimi ynë si PDK është i qartë dhe konsistent – Kosova është në krizë në çdo fushë dhe rrugëdalje e vetme janë zgjedhjet e parakohshme parlamentare, të cilat duhet të mbahen sa më parë. Prandaj edhe pjesëmarrja e Kryetarit Krasniqi në këtë takim do të jenë në funksion të diskutimit për mundësinë e caktimit të datës për zgjedhje të reja”, tha Abdullahu.
Ndërkohë, deputeti i Lidhjes Demokratike të Kosovës (LDK), Anton Quni, mbrëmë në një intervistë në emisionin “Info Nata” në Tëvë1 tha se LDK-ja ende nuk e ka konfirmuar ftesën, pasi që partia e tij nuk e sheh të arsyeshme që të diskutohet rreth përmbushjes së agjendës legjislative për sezonin pranveror.
“Nuk e kam njoftimin që ka ndonjë konfirmim, për aq sa kam mundur ta vërej nuk ka ndonjë disponim për t’u realizuar ky takim. Sepse, bëhet fjalë për agjendën e Kuvendit. Nuk e shohim të natyrshme që kjo temë të bartet në zyrat apo në të drejtën e kryeministrit”, ka thënë Quni.
Ndërkaq, as Aleanca për Ardhmërinë e Kosovës nuk ka kthyer përgjigje.
