Lumir Abdixhiku, kandidati për kryeministër i LDK-së, ka bërë të ditur se sot në Strellc të Deçanit, kujtuan me nder dhe krenari jetën dhe veprën e kolonel Tahir Zemajt, në 22-vjetorin e vrasjes të tij bashkë me djalin Enisin dhe kryetarin e Forumit të Rinisë në Deçan, Hasan Zemajt.
Abdixhiku ka deklaruar se humbja e të ndjerëve është mbetet një plagë e rëndë dhe e hapur për të gjithë, sepse sipas tij, ikja e tyre në kohë paqeje është dëshmi e betejës së papërfunduar për drejtësi ndaj patriotëve të mëdhenj të vendit .
“Kolonel Tahir Zemaj ishte mishërim i guximit dhe atdhedashurisë. Një ushtarak i përkushtuar dhe strateg i pashoq, ai udhëhoqi beteja të lavdishme në Dukagjin, duke i dhënë Kosovës shembullin më të denjë të një çlirimtari”, tha Abdixhiku
Ndërkohë, kujton ai heroizmin e kolonelit, qysh nga beteja e Loxhës.
“Nga beteja e Loxhës deri te përpjekjet e tij të pandalshme për unitet dhe drejtësi, figura e Tahir Zemajt qëndron si ikonë e qëndresës kundër shtypjes serbe dhe si shkëndijë e paepur që shkëlqeu fort rrugën drejt çlirimit. Si aktivist i orëve të para të Lidhjes Demokratike të Kosovës dhe bashkëpunëtor i afërt i Presidentit historik Dr. Ibrahim Rugova, Kolonel Zemaj ishte shembull vendosmërisë së palëkundur në lartësimin e parimeve të lirisë, demokracisë dhe unitetit kombëtar”, ka shkruar Abdixhiku.
Ai ka shtuar se kolonel Tahir Zemaj, Enis Zemaj dhe Hasan Zemaj janë dhe mbeten shembuj të pashlyeshëm të atdhedashurisë dhe guximit, dhe frymëzim për për çdo gjeneratë që do ta ndërtojë Kosovën e lirë dhe të drejtë.
