Banorët e kryeqytetit po ankohen se nuk po mund të shëtisin hapësirat e gjelbëruara nga insektet.
Bazuar në vitet e kaluara dezinsektimi do të duhej të fillonte nga pranvera, por një gjë e tillë ende nuk ka ndodhur.
Drejtori i Shëndetësisë në Prishtinë, Izet Sadiku, për Telegrafin tha se arsyeja e vonesës së dezinsektimit është skadimi i kontratës që tashmë është në procedurat e prokurimit.
“Ne këtë vit domethënë e kemi pasë një çështje që ka përfundua projekti domethënë në maj ka përfundua kontrata 3 vjeçare që e kemi pasë dhe prej janarit kemi qenë në proces të prokurimit dhe realisht kjo ka qenë njëra prej shkaqeve që na kanë ndihmua domethënë që ne u dashtë me fillua në fillim të qershorit me projektin”, tha ai.
Ndër tjera ai tha se një datë finale se kur do të fillojë dezinsektimi nuk ka por që është bërë një njoftim nga prokurorimi, ku thotë se do të nënshkruhet kontrata më 26.06.2024 dhe se pas nënshkrimit do të fillojë procesi.
“Ata e kanë bë një njoftim prokurorimi që do të bëhet nënshkrimi më datën 26.06.2024, në qoftë se bëhet nënshkrimi ne menjëherë pas nënshkrimit të kontratës do të fillojmë menjëherë projektin për dezinsektim hapësinorë”, tha ai.
