Pas përkrahjes që i dha shkrimtarja dhe gazetarja galiciane Ana Exposito Valle që lulëkuqja me katër petale të jetë simbol i viktimave të gjenocidit në Kosovë edhe aktori i njohur spanjoll Miguel Angel Garzon Utrilla ka dalë në mbështetje të kësaj kërkese.
Në komentin që ai ka bërë postimit të zonjës Valle, ai shkruan: “Historinë e tragjedisë që pësuan shqiptarët e Kosovës e di nga miq të ngushtë. Dëshiroj të shpreh mbështetjen time të plotë për nismën e Qendrës “Gjenocidi në Kosovë-Plagë e Hapur”, dhe se me mbështetjen e shumë njerëzve, lulëkuqja me katër petale është simboli me të cilin përkujtohen të gjitha viktimat e gjenocidit në fjalë. Drejtësi për popullin shqiptar të Kosovës!”.
Sa për njoftim, aktori Miguel Angel Garzon Utrilla, ka luajtur në shumë filma spanjoll dhe për shkak të zërit të tij karakteristik, viteve të fundit është i angazhuar si dublues zëri në sinkronizimin e filmave, kryesisht të zërit të aktorit të famshëm Neil Patrick Harris.
Qendra “Gjenocidi në Kosovë – Plagë e Hapur” e falënderon aktorin Miguel Angel Garzon Utrilla për këtë përkrahje të rëndësishme dhe sidomos e vlerëson lart kërkesën e tij që të ngadhënjejë drejtësia për viktimat e këtij gjenocidi.
