Eliminimi i Real Madridit nga Liga e Kampionëve po hedh dyshime serioze për të ardhmen e Carlo Ancelottit në Santiago Bernabeu, me sugjerimet se ai mund të kthehet në Serie A nëse i jepet mundësia për të trajnuar dy nga klubet e tij të preferuara.
Los Blancos u eliminuan nga gara kryesore evropiane e klubeve pas një disfate me rezultat përfundimtar 5-1 ndaj Arsenalit në çerekfinale, duke e shtyrë klubin të konsideronte shkarkimin e tij edhe para fundit të sezonit.
Ancelotti ka këmbëngulur se nuk dëshiron të dijë për fatin e tij në klub , por me Real Madridin ende në një garë të ngushtë për titullin e La Ligës – pas Barcelonës – dhe një finale e Kupës së Mbretit ende për t’u luajtur, edhe një gabim i vetëm mund të rezultojë fatal për trajnerin italian.
Me pozicionin e tij në rrezik dhe gjasat për të mbetur pa punë verën e ardhshme në rritje, La Gazzetta dello Sport raporton se Roma dhe Milani mund të dalin si destinacione të mundshme, pasi të dy klubet janë aktualisht në kërkim të një trajneri të ri.
Edhe pse Ancelotti kishte deklaruar më parë synimin e tij për t’u tërhequr pas periudhës së tij në Real Madrid, gazeta italiane thekson se ai gjithmonë ka shprehur një dashuri të thellë për dy gjigantët e Serie A, duke deklaruar se do të ‘kthehej në Roma herët a vonë’ dhe duke e përshkruar Milanin si një klub që “shënoi” jetën e tij – një që ai e konsideron “të veçantë” së bashku me Los Blancos.
Prandaj, largimi i tij nga Real Madridi mund të hapë derën për një rikthim në San Siro ose qëndrimin e tij të parë si trajner në Stadio Olimpico, ku ai kaloi tetë sezone si lojtar, shkruan telegrafi.Koha mund të jetë vendimtare, pasi të dy klubet mund të emërojnë trajnerë të rinj përpara se Ancelotti të bëhet zyrtarisht i disponueshëm, megjithëse perspektiva për të luajtur në garat evropiane sezonin e ardhshëm mund të peshojë gjithashtu shumë në vendimin e tij.
