Mesfushori i kombëtares shqiptare, Kristjan Asllani, ka folur hapur për lidhjen e tij me Interin në programin zyrtar (“matchday programme”) të ditës së ndeshjes së Serie A kundër Empolit.
22-vjeçari, i cili tashmë është në mesin e sezonit të tij të tretë me zikaltrit, iu bashkua skuadrës nga Empoli në verën e vitit 2022. Për Asllanin ka pasur momente të mira dhe të vështira gjatë kohës së tij me fanellën e Interit.
Ndërsa nuk ka arritur ende të imponohet si zgjedhja e parë në rolin e mesfushorit mbrojtës te zikaltrit, ai kurrë nuk ka reshtur së treguari motivimin për t’u rritur dhe përfituar nga kjo mundësi e madhe.
“Veshja e kësaj fanelle ka gjithmonë një efekt të veçantë për mua, – pranoi Asllani. – Mbërrita këtu kur isha 20 vjeç. Tani jam 22”.
Si ishin fillimet e tua në futboll?
Isha një fëmijë që gjithmonë kisha topin me vete. Futbolli më ka dhënë gjithmonë gëzim dhe emocion, më ka bërë të përjetoj momente të pabesueshme si fitorja e titullit vitin e kaluar.
Kush ju bëri të dashurohenit me futbollin?
Ishte babai im, ai që më bëri të dashurohem me futbollin. Mbaj mend që shkoja gjithmonë t’i shikoja ndeshjet me të. Më pas, pasionin e vërtetë ma transmetojnë tifozët, të cilët janë shpirti i këtij sporti. Të dalësh në fushë dhe të luash për ta është diçka që më bën krenar.
Cilin prej shokëve të skuadrës të pëlqen të sfidosh?
Më pëlqen të sfidoj Frattesin. Ndonjëherë ndalemi në stërvitje për të bërë disa gjuajtje dhe diskutojmë shumë për futbollin.
Po legjenda zikaltër që do doje ta sfidoje?
Më shumë se ta sfidoja, do të më kishte pëlqyer të luaja bashkë me të. Po flas për Sneijder, një lojtar që e mbaj mend shumë mirë, me shumë teknikë dhe këmbë të pabesueshme.
Cila ka qenë sfida më e madhe?
Ka qenë ajo e ardhjes këtu tek Interi, por duke punuar kam arritur disa kënaqësi. Gjithashtu, në Europianin me Shqipërinë ka qenë një emocion i jashtëzakonshëm.
A ju kujtohet goli i parë me Interin?
Goli i parë me Interin në ‘San Siro’ kundër Genoas ishte momenti më i bukur i karrierës sime. E kisha pritur dhe dëshiruar shumë. Pas një viti e gjysmë, më në fund erdhi ai gol.
Po titullin e yllit të dytë…
Ishte një moment i paharrueshëm për mua dhe për grupin. Të fitosh një titull të Serie A në moshën time me skuadrën që gjithmonë e kam mbështetur ishte një emocion i madh.
Nga Empoli tek Interi…
Kur lashë Empolin për të ardhur tek Interi ishte pak e vështirë, sepse po lija një ekip ku kisha luajtur për 13 vite, por nga ana tjetër, e dija që po nisja një rrugëtim që e kisha ëndërruar gjatë.s.n.
