Profesori i shkencave politike, Artan Mustafa vlerëson se Asociacioni i Komunave me shumicë serbe do të delegojë një pjesë të pushtetit për komunitetin serb në Kosovë.
Ai tha se kjo është vërjetur në të gjitha dokumentet që nga marrëveshja e vitit 2013 e deri të këto te fundit.
“Do të ketë një bazë kolektive të pushtetit për komunitetin serb e cila do të ketë fuqi përfaqësuese simbolike. Do të krijohet një statut që sipas deklaratave të emisarëve amerikanë është thënë që do të shkojë përmes ‘parliamentiary and judiciary review’, pra mekanizmave parlamentarë dhe potencialisht Gjykatës Kushtetuese të Kosovës dhe do të ketë një delegim, një devoluim të pushtetit sipas të gjithë atyre dokumenteve që i kemi pa deri tash, prej marrëveshjes së 2013 e deri te këto modele që janë propozu prej ndërmjetësve evropianë, pastaj diskutimeve të fundit të dy liderëve në Bruksel”.
Sipas Mustafës, ka rrezik të ketë një autonomi të gjerë për komunitetin serb e cila mund të sjellë një lloj ‘palestinizimi’ të Kosovës.
“Nuk është kjo autonomia domosdoshmërisht vetëm lajm negativ për shkak se shumë demokraci të vendosura, të zhvilluara, i kanë zgjidh problemet e këtilla përmes autonomive apo federalizimit, në të kaluarën në historinë e tyre politike. Mirëpo problem këtu është që do ta kemi një rast të një prej autonomive më të gjera në Evropë, por pa përfundim si shtet klasik në arenën ndërkombëtare”, ka deklaruar Mustafa në Respublika në Tëvë 1.
“Është një lloj autonomie e gjerë por me një lloj palestinizimi për Kosovën në arenën ndërkombëtare sepse kjo pasiguria në lidhje me statusin ndërkombëtar të Kosovës, përkundër vendimit shumë pozitiv të GjND-së, nuk po vjen duke u kristalizu, përfundu, për shkak se nuk ka siguri që do të integrohemi në BE, se këto shtete mosnjohëse do të na njohin, që ka ndonjë shansë të integrimit në Kombe të Bashkuara e ndoshta vështirësi do të ketë edhe për integrim në NATO, edhe pse është pa në diskursin e brendshëm si më e mundshme të realizohet”, ka shtuar ai.
