Banka Evropiane për Rindërtim dhe Zhvillim (BERZH) ka bërë të ditur se i ka ofruar Ministrisë së Financave, Punës dhe Transfereve të Kosovës një kredi sovrane deri në 25 milionë euro në dobi të Kompanisë Rajonale të Ujësjellësit “Prishtina” për përmirësimin e trajtimit të ujërave të zeza, nëpërmjet ndërtimit të dy impianteve për trajtim të ujërave të zeza dhe zgjerimit të rrjetit.
Sipas njoftimit të BERZH-it, projekti përfshin ndërtimin e një impianti që do t’i shërbejë një popullate deri në 50,000 banorë dhe do të zvogëlojë dëmet mjedisore të shkaktuara nga ujërat e zeza të patrajtuara që lëshohen në lumin e Llapit, i cili po ndot burimet ujore sipërfaqësore dhe lumenjtë e afërt.
Sipas njoftimit, ky projekt do të zgjerojë dhe përmirësojë rrjetin lokal të kanalizimeve të ujërave të zeza, si dhe do të ndërtojë një impiant në shkallë të vogël për trajtim të ujërave të zeza, duke përdorur zgjidhje të bazuara në natyrë.
Udhëheqësi i BERZH-it për Kosovën, Sergiy Maslichenko ka thënë se është krenar që BERZH vazhdon mbështetjen e projekteve kyçe të infrastrukturës në Kosovë.
”Kjo iniciativë shënon një tjetër hap përpara në rritjen e kapaciteteve të vendit për trajtimin e ujërave të zeza, duke adresuar një nevojë kritike për përmirësimin e higjienës dhe reduktimin e ndotjes së mjedisit për mirëqenien e qytetarëve të Kosovës. Së bashku, jemi të përkushtuar për të krijuar zgjidhje të qëndrueshme që nxisin përparimin afatgjatë dhe një të ardhme më të shëndetshme për të gjithë”, ka thënë ai.
Ministri i Financave, Punës dhe Transfereve, Hekuran Murati, ka theksuar se qeveria e Kosovës veç i ka realizuar një sërë projektesh që kishin për qëllim mbrojtjen e mjedisit dhe sigurimin e mirëqenies së qytetarëve të vendit, duke përfshirë projektet për trajtimin e ujërave të zeza në Prishtinë, Ferizaj, Gjilan dhe Mitrovicë.
Ndërsa kryetari i Komunës së Podujevës, Shpejtim Bulliqi, tha se ndërtimi i këtij impianti jo vetëm që do të sigurojë që trajtimi i ujërave të zeza të jetë në përputhje me standardet evropiane, por gjithashtu do të luajë një rol kyç në uljen e ndotjes së lumenjve dhe ruajtjen e burimeve ujore.
“Zbatuese e projektit do të jetë Kompania Rajonale e Ujësjellësit “Prishtina”, ndërsa Agjencia Suedese për Bashkëpunim Ndërkombëtar për Zhvillim (SIDA) është duke e mbështetur këtë kompani për përgatitjen e projektit, me një grant prej 270 mijë eurosh”, thuhet në njoftim.
Tutje thuhet se ky projekt është plotësisht i përafruar me strategjinë e vendit të Bankës për Kosovën, e cila synon të mbështesë zhvillimin e infrastrukturës më të qëndrueshme dhe më reziliente ndaj klimës.
BERZH deri më tani ka derdhur më shumë se 770 milionë euro në Kosovë përmes 120 projekteve deri më sot.
