Kjo ishte për të frymëmarrja e lirisë… e munguar prej shumë kohësh. Përqafime, lot gëzimi dhe përsëri përqafime të gjata…
Ishte kjo pritja që iu bë të burgosurve amerikanë pasi prekën tokën e Shteteve të Bashkuara të mundësuar nga shkëmbimi më i madh i “pengjeve” politikë me Rusinë që prej Luftës së Ftohtë. Gazetarët Evan Gershkovich, Alsu Kurmasheva dhe ish-marinsi, Paul Whelan, u pritën nga presidenti Joe Biden dhe zëvendësja e tij, Kamala Harris në bazën ushtarake të Mariland. Më pas u ribashkuan me familjarët e tyre.
Marrëveshja mes perëndimit dhe Rusisë solli lirimin e 24 të arrestuarve nga 7 vende të ndryshme, mes tyre pati edhe minorenë. Kreu i Shtëpisë së Bardhë falënderoi aleatët që kontribuan në rifitimin e lirisë së të burgosurve.
“Nuk ka asgjë përtej kapaciteteve tona nëse punojmë së bashku. E mbajta fjalën. Aleancat bëjnë diferencën. Ata u ngritën dhe shfrytëzuan rastin për ne. Kjo kishte shumë rëndësi. Jemi të kënaqur që janë në shtëpi”, u shpreh Biden.
Lot gëzimi, por më pak përqafime, pati në Rusi. Presidenti Vladimir Putin doli personalisht në një aeroport të Moskës për të pritur të burgosurit e tij të shkëmbyer me perëndimin.
“Së pari dua t’ju uroj të gjithëve për kthimin në atdhe. Tani dua t’ju drejtohem juve që jeni të përfshirë drejtpërdrejt në shërbimin ushtarak. Dua t’ju falënderoj për besnikërinë ndaj betimit, detyrës dhe atdheut tuaj, që nuk ju ka harruar për asnjë minutë. Dhe tani ju jeni të nominuar për çmime shtetërore në shtëpi. Ju faleminderit shumë”, deklaroi Putin, shkruan A2CNN.Negociatat për lirimin e të burgosurve zgjatën më shumë se 18 muaj dhe besohet se mbaheshin peng nga kërkesa e Moskës për kthimin e vrasësit Vadim Krasikov, i cili po vuante një dënim të përjetshëm në Gjermani. Ndër personat e liruar nga Rusia është edhe disidenti Vladimir Kara-Murza që mbante dy shtetësi, përfshirë atë britanike.
